सहज सेवा देऊ

लामो समयको प्रतिक्षापछि सुर्खेत–काठमाडौं ठूलो जहाजको उडान सुरु भएको छ । बुद्ध एयरले काठमाडौं–सुर्खेत एटीआर–७२ जहाजबाट नियमित उडान सुरु गरेको छ । उक्त रुटमा शुक्रवारदेखि नियमित उडान प्रारम्भ गरिएको हो । सुर्खेत विमानस्थलमा गएको कार्तिक ३० गते एटीआर–७२ जहाजको परीक्षण उडान गरिएको थियो । परीक्षण उडान सफल भएसँगै नियमित उडान भर्न सुरु गरिएको हो । शुक्रवार ७० जना यात्रु बोकेर बुद्ध एयरको एटीआर जहाज सुर्खेत विमानस्थलमा अवतरण गरेको थियो । ७२ सीट क्षमताको ठूलो जहाजबाट यो रुटमा पहिलो व्यावसायिक उडान भरेको हो । ठूलो जहाज सञ्चालनमा आएसँगै कर्णालीमा खुसीयाली छाएको छ । काठमाडौंका लागि नेपालगञ्ज पुग्नुपर्ने बाध्यता अन्त्य हुने अपेक्षा यहाँको नागरिकको छ ।

एटीआर–७२ जहाजले अब दैनिक काठमाडौं–सुर्खेत एक उडान गर्नेछ । यसअघि कम्पनीले ४७ सीट क्षमताको एटीआर–४२ जहाजबाट यो गन्तव्यमा दैनिक एउटा उडान गर्ने गरेको थियो । ठूलो जहाजमार्फत उडान भर्न सुरु भएपछि यात्रुलाई सहजताका साथै कर्णाली प्रदेशको व्यवसाय तथा पर्यटन क्षेत्रको विकासमा मद्दत पुग्ने विश्वास लिइएको छ । ठूलो क्षमताको जहाजबाट नियमित उडान भए काठमाडौं–सुर्खेत हवाई भाडादर पनि सस्तो हुने अपेक्षा गरिएको छ । अहिले काठमाडौं–सुर्खेतसम्मको हवाई भाडा निकै चर्को छ । यो रुटमा यात्रुहरूले १४ हजारसम्म भाडा तिर्दै आएका छन् । भाडा महँगो हुँदा कर्णालीका अधिकांश यात्रु नेपालगञ्ज भएर काठमाडौं जाने गर्छन् । बुद्ध एयरले ७२ सीटे जहाजमा भने न्यूनतम् भाडा सात हजारबाट सुरु हुने जनाएको छ । धेरै सीट क्षमताको जहाजले सेवा दिँदा यात्रुहरूलाई सहज हुने र भाडा पनि कम पर्ने बुद्ध एयरको भनाइ छ । नियमित बिहान १० बजे काठमाडौंबाट सुर्खेत र ११ः३५ बजे सुर्खेतदेखि काठमाडौं उडान हुनेछ ।

भाडादर घटाइएको भनिए पनि महँगो भाडा तिर्नुपरेको गुनासो सुनिन थालेको छ । सिमित सीटलाई मात्रै न्यूनतम् दर दिएर अन्यबाट अधिकतम् भाडा उठाइएको यात्रुहरूले बताएका छन् । यसले भने नागरिकमा पुनः निराशा पैदा गरेको छ । ठूलो जहाजले सेवा सञ्चालनमा ल्याउनु सकारात्मक कुरा हो । तर योसँगसँगै त्यसको भाडादरमा पनि सहजता र सुलभ हुनु जरुरी छ । भाडादर सुलभ हुन नसकेमा नेपालगञ्ज गएर जहाज चढ्नुपर्ने कर्णालीबासीको बाध्यता कायमै रहनेछ । यसमा सम्बन्धित उडान कम्पनी र सरकारी निकायले ध्यान दिन जरुरी छ । भाडादरलाई यात्रुमैत्री बनाएर सेवा विस्तार गर्न सकेमा मात्रै त्यसले नागरिकलाई सहजता प्रदान गर्नेछ ।

प्रकाशित मितिः   ३ पुष २०७९, आईतवार ०५:०३