सुर्खेतम थारु भासा संस्कृति संरक्षणसम्बन्धी तालिम

 

सुर्खेत: यह गैलक २०८२ चैत २७ ठेसे २९ सम वीरेन्द्रनगर ९, पातलगंगाम थारु समुदायके भाषा साहित्य तथा संस्कृति संरक्षणसम्बन्धी टिन दिन्या तालिम सम्पन्न हइल बा । वीरेन्द्रनगर नगरपालिकाके आर्थिक सहयोगम नगरके उद्योग तथा नियमन शाखाके अध्यक्ष दिपेन सुवेदीके अध्यक्षताम वडा नं. ९ के थारु महिला हुकहन थारु जातिके इतिहास, भासा कला, संस्कृति संरक्षण सम्बन्धी प्रशिक्षण कैगिलक हो ।

तालिमके उद्घाटन कर्टि बर्का पहुना वीरेन्द्रनगर नगरपालिकाको नगर उपप्रमुख निलकण्ठ खनाल थारु समुदायके मौलिक आपन भासा, कला, संस्कृतिम युवा पुस्ता सक्रिय हुइपर्ना ओ लौव पुस्ताम पुस्तान्तरण करपर्ना जरुरी रलक बात ढर्ल । टिन दिनसम चलल तालिमम शिक्षक, पत्रकार एवम् थारु अनुसन्धान कर्ता मान बहादुर चौधरी, थारु अगुवा सितली चौधरी, शिक्षक मिना चौधरी ओ गाभर भ्याली थारु होमस्टे व्यवसायी कृष्णलाल चौधरी, पातलगंगा थारु होमस्टेके अध्यक्ष डिल बहादुर चौधरी एवम् भगिरथ चौधरी लगायतके व्यक्ति हुक्र प्रशिक्षण डेल रलह ।

तालिम वडा नं. ९ के करिब ३० जन सहभागी रलह । थारु भासा कला संस्कृतिम समृद्ध मानजिना थारु समुदायके परम्परागत पहिचानयुक्त संस्कृतिह संरक्षण कर्टि युवा पुस्ताम पुस्तान्तरण कर पर्ना आवश्यक रलक बात प्रशिक्षक हुक्र बटोइल रलह । असिन तालिम गाउँम किल सिमित नाकैक समग्र जिल्लाके गाउँगउँम चलाइ पर्ना माग तालिमम सहभागिन रलहिन् ।

प्रकाशित मितिः   ९ बैशाख २०८३, बुधबार ११:१६