सुर्खेतम थारु डेउ ठन्वाके घुरघट उघार्गिल
वीरेन्द्रनगर नगरपालिका वडान नं १२ पदमपुरम थारु भुइह्यार ठन्वाके नवनिर्मित भवनके घुरघुट खोलाइ कार्यक्रम यह गैलक वैशाख ११ गते सम्पन्न कैगिल रह । वीरेन्द्रनगर नगरपालिकाके आर्थिक सहयोगम ठन्वा निर्माण हुइलक हो ।
ठन्वाके घुरघुट खोलाइ कार्यक्रमके बर्का पहुना वीरेन्द्रनगर नगरपालिकाके वडा नं १० के अध्यक्ष डिल बहादुर रखाल थारु समुदायके धार्मिक सांस्कृतिक पक्षसे जोरगिल ठन्वा निर्माण कार्यले संस्कृति जर्गेनाम एकठो इटा ठप्गिल बात ढर्टि हेरैटिगैल थारु पूजापाठ रीतिरिवाजके पुनर्जागरण हुइना हुइलक ओहर्से थारु समाजम एकठो लौव सन्देश जैना बात ढर्ल । ओसहख विशेष पहुना वडा नं. १२ के वडा अध्यक्ष चुडामणि चपाईं वडाके सहयोग निर्माण हुइलक ठन्वा निर्माणम नगरपालिका ओ वडा कैक करिव सवा पाँच लाख अनुदानम निर्माण कैगिल बात व्यक्त कर्ल । आपन वडाम सक्कु जातजातिके कलासंस्कृतिके लाग बजेट छुट्याख काम कर्टि अइलक बात ढर्टि थारु समुदायके ठन्वा निर्माण थारु मौलिकपन अनुसारके निार्माणले परम्परागत संस्कार जोगिना काम कैगिल बात कर्ल ।
कार्यक्रमम लखागिन थारु उत्थान मञ्च, सुर्खेतके अध्यक्ष एवम् थारु साहित्यकार मान बहादुर चौधरी ‘पन्ना’ भुइह्यार ठन्वा थारुनके मूल संस्कृति हो । ठन्वा थारुन जोर्ना पुल हो, ठन्वा धार्मिक एकताके प्रतीक किल नाहि जीवनपद्धतिसे जोरगिल मैगर संस्कृति हो । यकर संरक्षण संवर्धन हुइना बहुत जरुरी हुइलक धारणा व्यक्त कर्ल । ठन्वाके निर्माण एवम् पूजापाठ निहुइलक कारण थारु समुदायम धर्म परिवर्तन कर्ना प्रवृत्ति बहर्टि गैलक बात ढर्ल । ठन्वा निर्माण किल महत्वपूर्ण निहो ठन्वाम कैजिना पूजापाठ ढुरेरी पूजा, हरेरी पूजा, मार मिन्ही नियमित कर्ना चुनौती रलक बात बा ओहमार पूजापाठके विधिह नियमित करपर्ना सुझाउ डेल रलह ।
कार्यक्रमम थारु कल्याणकारिणी सभाके केन्द्रीय अध्यक्ष कृष्ण बहादुर चौधरी, जिल्ला सभापति अध्यक्ष बेचुलाल चौधरी, पदमपुरके समाजसेवी लालबहादुर चौधरी लगायतके वक्ता हुक्र ठन्वा निर्माणले सुर्खेती थारु समुदायमा एकठो असल पाठ सिखैलक धारणा व्यक्त कर्ल ।
ठन्वा निर्माण समितिके अध्यक्ष एवम् पदमपुर गाउँके मटावा दुर्ग बहादुर थारु पदमपुर गाउँम विगत २०७८ सालठेसे नियमित रुपम मारमिन्ही, ढुरेरी, हरेरी पूजा करैटि अइलक बात ढर्ल । करिब ३ बरस बर्दियासे गुरुवा लान्खन पूजा कैगिल कलसे हाल सुर्खेतम नै गुरुवा व्यवस्था कैगिल बात ढर्ल ।
कार्यक्रमम विभिन्न पदमपुर गाउके विविध मेरमेरिक थारु नाच प्रस्तुत कैगिल रह । कार्यक्रमके सञ्चालन, व्यवस्थापन विष्णु चौधरी कर्ल रलह ।
साझा बिसौनी ।