गाउँ पुरान हो तर सुनसान लागठ

१. गाउँ पुरान हो तर सुनसान लागठ
आफन आफन्त नैचिहिन्जिना अन्जान लागठ

२. आजकाल गाउँक गल्लीम झार बनझार जामल बा
झोप्रिझोप्रा घर फे चुहुना हुइल बा
खुटा, भित्ता, बाती, मक्राइल बा
गाउँक मन्डर्या बन्टाहान डाडु, डहितान भैया
आजकाल गाउँम निहुइट
बरघरान भौजि, बन्कटान बहुरियाफे
सहरम डेरा लेक बैठल बाट कटि
छाइ छावन बोरिङ् स्कुलिम पह्रैठ कटि
ओहमार,
गाउँ पुरान हो तर सुनसान लागठ
आफन आफन्त नैचिहिन्जिना अन्जान लागठ ।

३. मोर गाउँ अम्हिन् फे रङ रूप नैफेर्ल हो,
खरक छानीक ठाउँम पाटिर टिनबाहेक कुछ नैफेर्ल हो
आजकाल,
बुह्रापाका, बुडिबुबा ओ जन्याओनके गाउँ बनल बा
जार पिक मड्डुयनके गाउँ बनल बा
युवा, ठर्या, बठिनेन्के नामो निसान नै हो
धान, मकै फरैना गाउँम कौनो किसान फै नै हो
सबके मनम विदेश ओ सहरके भूत सवार हुइल डेख्ठु
आफन माटि, जन्मल ठाउँ बिर्सैटि गैल डेख्ठु
पहर्ख गाउँम भविष्य निडेख्ना बात किल सुन्ठु
सायद ओहमार हुइ,
गाउँ पुरान हो तर सुनसान लागठ
आफन आफन्त नैचिहिन्जिना अन्जान लागठ ।

४. मक्राइल जिउ लेक बुह्रापाका किल गाउँम बैसलबाट
लक्का जवान, भारा बैसन ठर्या बठिन्या सब विदेश पैसल बाट
टर्निन् सब सहरम सरलबाट
गाउँक खेट्वा, बारी आजकाल बाँझो बा
गाउँम कोड्रा, फह्र्वा चलैना मनैनके खाँचो बा
सिक्री परल गाल लेक बुह्रोन
आपन छाइछावनके अस्राम आँखिक बहर्नी फट्कर्टि बाट
आँश ओ आसले बाँचल पुरान पुस्ताकिल डेख्ठु
विदेशी छावाह यहाँ मुओल लास अस्या लग्ना दिन आइल डेख्ठु
पोर बन्जरान काका मुल ट
चार दिन अस्पतालके फ्रिजम ढर पर्लिन्
यहाँ मलामि फे भाँडाम लिह पर्ना दिन आइल डेख्ठु
ओहमार,
गाउँ पुरान हो तर सुनसान लागठ
आफन आफन्त नैचिहिन्जिना अन्जान लागठ ।

५. सँग धान रोप्ना रोपुइया दिदीबाबुनके कमि बा गाउँम
सँग धान कट्ना औली लेना डाडुभैयनके अभाव बा गाउँम
बट्कुहिसक होगिल आब पुरान रिटभाँट
लोप होगिल आब पुरन्या गिटबास
गाउँक सझ्या ठन्वक छानीफे हुरिले उरासेकल
सित्तर छाहि डेना पिप्रा ओ बरगड फे बुह्रा सेकल
सख्या, मघौटा नच्ना गाउँ आजकाल सुनसान बा
आपन कला संस्कृति का हो ? युवा पुस्ता अन्जान बा
ओह फे मै आशावादी बाटु
विडेश गिल बन्टाहान डाडु, डहितान भैया
सहर पैसल बरघरान भौजि, गौट्याहान बहोर्या फेनसे गाउँम आऊ
सहर ओ विडेसम सौस्याटल मनह सख्या ओ मघौटाम रमाऊ
टुहार अभावम मोर गाउँ सुनसान लागठ
आपन ख्यालल गल्ली, हुर्कल ठाउँ अन्जान लागठ
ओहमार कठु,
गाउँ पुरान हो तर सुनसान लागठ
आफन आफन्त नैचिहिन्जिना अन्जान लागठ ।

– मानबहादुर चौधरी ‘पन्ना’

 

---

पृष्ठ संयोजकः मानबहादुर चौधरी, पत्राचारके लाग ठेगानाः इमेल: [email protected], [email protected] र मो.न.: ९८४८०४०८८०

प्रकाशित मितिः   १२ मंसिर २०८१, बुधबार ०६:०४