दुई खण्डको नयाँ ठेक्का सम्झौता

 

 

सुर्खेत: मदन भण्डारी राजमार्गअन्तर्गत पश्चिम सुर्खेतका दुई खण्डमा नयाँ ठेक्का सम्झौता गरिएको छ । चौकुने गाउँपालिकाको वडा नं. ३ बल्देदेखि वडा नं. २ लगामसम्म र पञ्चपुरी नगरपालिकाको वडा नं. ३ चौरदेखि वडा नं.९ विद्यापुरसम्म ठेक्का सम्झौता गरिएको हो ।

दुई खण्डमा गरी २५ किलोमिटर सडक निर्माण गरिने मदन भण्डारी राजमार्ग योजना कार्यालय सुर्खेतले जनाएको छ । दुई खण्डलाई एउटै प्याकेज गरी सडक निर्माण गर्न लागिएको हो । जसअन्तर्गत बल्देदेखि लगामसम्म १५ किलोमिटर र चौरदेखि विद्यापुरसम्म दश किलोमिटर सडक निर्माण गरिनेछ । ठेक्का सम्झौता भइ सडक निर्माणको काम अघि बढेको राजमार्ग योजना कार्यालयका इन्जिनियर रेशम ओलीले बताए । उनका अनुसार दुई खण्डको कामलाई एउटै प्याकेजमा गरी सडक निर्माण गर्न लागिएको हो ।

दिवा यति बिल्डर्स सातदोबाटो ललितपुर र मदन भण्डारी राजमार्ग योजना कार्यालय सुर्खेतबीच ठेक्का सम्झौता भएको छ । २०८१ भदौ १४ देखि २०८४ भदौ १४ गतेसम्म निर्माण सम्पन्न गर्नुपर्ने सम्झौतामा उल्लेख गरिएको छ । एक अर्ब २६ करोड लागतमा २५ किलोमिटर सडक निर्माणको सम्झौता गरिएको हो ।

यो आयोजना अघि बढेसँगै पश्चिमका तीनै खण्डमा काम सुरु भएको छ । यसअघि बड्डीचौर–खम्बागाडे र विद्यापुर–बल्दे सडक खण्ड निर्माणको काम अघि बढाइएको थियो । ४५ किलोमिटरको सडकलाई तीन खण्डमा विभाजन गरेर निर्माण थालिएको छ । अहिले तीनै खण्डको काम सुरु भएको हो । विद्यापुर–बल्दे सडक खण्डमा निर्माणको काम धमाधम भइरहेको छ । पश्चिम क्षेत्रका तीन खण्डमध्ये यो तेस्रो खण्ड हो । २२ किलोमिटर सडक खण्ड निर्माणका लागि एक अर्ब २१ करोड रूपैयाँमा काम सम्पन्न गर्नेगरी बानियाँ मोतिदान डि.एस. जेभी काठमाडौंले ठेक्का सम्झौता गरेको छ ।

सम्झौताअनुसार २०७९ फागुन १७ गतेदेखि सुरु भएको काम २०८२ फागुन १६ गतेसम्म सम्पन्न गरिसक्नुपर्नेछ । उक्त खण्डको भौतिक प्रगति ५५ प्रतिशत हासिल भएको छ भने वित्तिय प्रगति ५२ प्रतिशत भएको छ । राजमार्गको जंगल क्षेत्रमा पर्ने रुखको कटानको काम पनि सकिएको भण्डारी राजमार्ग योजना कार्यालय सुर्खेतले जनाएको छ । यो सडकखण्डमा आधाभन्दा बढी जंगल क्षेत्र परेको कार्यालयका इन्जिनियर ओलीले बताए । सडक आयोजनाअन्तर्गतका निर्माणका काम धमाधम भइरहेको छ ।

मदन भण्डारी राजमार्ग अन्तर्गतकै बड्डीचौर–खम्बागाडे सडक खण्डको काम भने सुस्त गतिमा भइरहेको छ । हालसम्म २१ प्रतिशत भौतिक प्रगति भएको छ । वित्तीय प्रगति २० प्रगति भएको छ । उक्त सडक खण्डको साढे १२ किलोमिटरमा सडक निर्माणको काम भइरहेको हो । यो सडक खण्डका लागि प्रदेश सरकारले ४२ करोड बजेट विनियोजन गरेको छ । उक्त खण्डमा अनक जयदेवी जेभी बाँकेले ४२ करोड ४७ लाख ६१ हजार रूपैयाँमा प्रदेश सरकारको पूर्वाधार विकास निर्देशनालयसँग सम्झौता गरेको हो ।

२०७९ देखि काम सुरु भएको उक्त खण्डमा २०८१ असार १५ गतेसम्म काम सम्पन्न गर्नुपर्ने भएपनि काम अझै अधुरै छ । अहिले म्याद थप गरिएको छ । २०८२ असार १२ गतेसम्मका लागि म्याद थपिएको छ । उक्त खण्डमा अहिले निर्माणको काम ठप्प छ । रुख कटानको आदेश नहुँदा उक्त खण्डमा काम हुननसकेको पूर्वाधार विकास निर्देशनालय सुर्खेतले जनाएको छ । अबको केही दिनमा निर्माणको काम सुरु गरिने कार्यालयका सूचना अधिकारी वीरेन्द्रजंग शाहीले बताए ।

प्रकाशित मितिः   २४ कार्तिक २०८१, शनिबार ०६:०६