कर्णाली याक्सको जर्सी सार्वजनिक

सुर्खेत: नेपाल प्रिमियर लिग (एनपीएल) को फ्रेन्चाईज टोली कर्णाली याक्सले आफ्नो आधिकारिक जर्सी सार्वजनिक गरेको छ । शुक्रवार काठमाडौंमा आयोजित एक कार्यक्रमका बीच जर्सी सार्वजनिक गरिएको हो ।

नेपाल सरकारका पूर्व उपप्रधानमन्त्री तथा नेपाली कांग्रेसका नेता पूर्णबहादुर खड्काको समेत उपस्थितिमा टिमका मार्की प्लेयर सोमपाल कामी, मुख्य प्रशिक्षक तथा टिम डिरेक्टर ज्ञानेन्द मल्ल, फेस अफ दि कर्णाली याक्स स्वस्तिमा खड्काले संयुक्त रूपा जर्सी सार्वजनिक गरेका थिए । जर्सीमा कर्णालीको प्रतिनिधित्व गर्ने हिमाल र संस्कृति समेटिएको छ भने याकको सांकेतिक तस्वीर पनि छ । निलो रङको जर्सीमा पहेँलो रङ मिलाएर जर्सी तयार पारिएको छ ।

मार्की खेलाडी सोमपालले आफूले खेल्न सुरु गर्दा यो लेभलमा लिग हुन्छ भनेर सपना देखेको र अहिले आएर पूरा हुन लागेको देख्दा खुशी लागेको बताए । सोमपालले कर्णाली याक्स टिम सन्तुलित रहेको र राष्ट्रिय टिमका पूर्व कप्तान ज्ञानेन्द्र मल्लको प्रशिक्षणमा लिग खेल्न आफू उत्साहित रहेको पनि बताए । सोमपालले एनपीएले विगतको भन्दा ठूलो लिग हुन लागेको र यसबाट नयाँ खेलाडीहरू पनि आउने अपेक्षा व्यक्त गरे । यस्तै कर्णाली याक्स टिम सन्तुलित रहेको र लिगमा राम्रो प्रदर्शन गर्ने बताए ।

नेता पूर्णबहादुर खड्काले आफू युवा तथा खेलकुद संस्कृति मन्त्री हुँदा २६ वर्षअघि टीयू मैदानमा जिटिभीले प्रतियोगिता आयोजना गरेको स्मरण गर्दै अहिले एनपीएल सम्म आइपुग्दा नेपाल क्रिकेटको विकास भएको बताए । उनले क्यान सचिव पारस लगायतले मिलेर सरकार र व्यवसायिकसँग मिलेर क्रिकेटलाई राम्रो गराउन लाग्नु भएको भन्दै सबैको सबैको एकताबाट नेपली क्रिकेटले अन्तर्राष्ट्रियस्तरमा जित्न सक्ने विश्वास व्यक्त गरे ।

नेपाल क्रिकेट संघ (क्यान) का सचिव पारस खड्काले एनपीएल नेपाली क्रिकेटमा सुरुवात रहेको र लिगलाई भविष्यमा काठमाडौं बाहिर पनि आयोजना गर्ने गरी योजना रहेको बताए ।

प्रकाशित मितिः   २४ कार्तिक २०८१, शनिबार ०६:०२