वार्षिकोत्सवसहित अभिभावक दिवस
सुर्खेत: शिव माध्यमिक विद्यालय वीरेन्द्रनगर–११ घुलियाबिटको ४०औँ वार्षिक उत्सव तथा अभिभावक दिवस मनाइएको छ । शुक्रवार विद्यालयमा एक कार्यक्रमको आयोजना गरी वार्षिकोत्सवसहित अभिभावक दिवस मनाइएको हो ।
विद्यालय व्यवस्थापन समितिका अध्यक्ष कृष्णप्रसाद तिवारीको अध्यक्षता तथा कर्णाली प्रदेशका मुख्यमन्त्री यामलाल कँडेलको प्रमुख आतिथ्यतामा कार्यक्रम भएको हो । जसमा अतिथिहरूलाई विद्यालयले सञ्चालन गरेको भेटेनरी क्लिनिक, कुरा फार्म, धान खेतीलगायतको पनि अवलोकन गराइएको छ । त्यसैगरी परम्परागत साँस्कृतिक प्रस्तुतीका साथै घरेलु उत्पादनको समेत प्रदर्शनी गराइएको थियो ।
कार्यक्रममा विद्यालयका प्रधानाध्यापक पूर्णप्रसाद पौडेलले विद्यालयको प्रगति प्रतिवेदन प्रस्तुत गरेका थिए भने शिक्षक रत्नप्रसाद कँडेलले सामाजिक परीक्षण प्रतिवेदन प्रस्तुत गरेका थिए । वार्षिकोत्सवको अवसरमा आयोजना गरिएको सप्ताहव्यापी गतिविधिमा उत्कृष्ट हुने विद्यार्थीहरूलाई पुरस्कृत समेत गरिएको छ । त्यसैगरी वर्ष शिक्षक, वर्ष विद्यार्थी, वर्ष अभिभावकलगायत विद्यालयलाई सहयोग गर्ने व्यक्तिहरूलाई सम्मान पनि गरिएको विष्णुप्रसाद तिवारीले जानकारी दिए ।
साझा बिसौनी ।