आज प्रधानमन्त्री नियुक्ति हुने

काठमाडाैं: मुलुकको नयाँ प्रधानमन्त्रीमा दाबी गरेका नेकपा (एमाले) का अध्यक्ष केपी शर्मा ओलीले सोमवार पद तथा गोपनीयताको शपथ लिने तयारी गरेका छन् । नेपाली कांग्रेसको समर्थनमा शुक्रवार राति नै ओलीले संविधानको धारा ७६ (२) बमोजिमको प्रधानमन्त्री दाबी पेस गरेका छन् । पुष्पकमल दाहाल प्रचण्डले प्रतिनिधिसभाबाट विश्वासको मत नपाएर पदमुक्त भएपछि राष्ट्रपति रामचन्द्र पौडेलले आइतवार साँझ ५ बजेसम्म प्रधानमन्त्रीमा दाबी पेस गर्ने समय दिएका छन् ।

राष्ट्रपति कार्यालयले प्रकाशित गरेको आह्वान प्रस्तावको समय आइतवार साँझसम्मै रहेकाले सोमवार मात्र शपथ हुने भएको हो । ‘दिइएको समय सीमापछि मात्र नियुक्ति प्रक्रिया र शपथको प्रक्रिया अगाडि बढ्छ’, राष्ट्रपतिका प्रेस सल्लाहकार किरण पोखरेलले भने । स्रोतका अनुसार, आइतवार साँझ राष्ट्रपति रामचन्द्र पौडेलले ओलीलाई प्रधानमन्त्री नियुक्ति गर्नेछन् । ‘आइतवार अबेर हुने भएकाले सोमवार बिहान ११ बजे शपथ लिने तयारी छ’, स्रोतले भन्यो ।

ओलीले प्रधानमन्त्रीको शपथ लिए लगत्तै एमालेबाट विष्णुप्रसाद पौडेल र कांग्रेसबाट प्रकाशमान सिंहले उपप्रधानमन्त्रीको शपथ लिनेछन् । सोमवार नै अरु मन्त्रीहरूलाई पनि शपथ गराउने तयारी भइरहेको छ । ‘संभवतः १५ जनाको मन्त्रिपरिषद् सोमवार नै गठन हुन्छ, त्यसैको तयारी भइरहेको छ’, स्रोतले भन्यो ।

प्रकाशित मितिः   ३१ असार २०८१, आईतवार ०९:४४