आरसी–३२ ‘बी’ डिभिजनमा

सुर्खेत:  सुर्खेतको आरसी–३२ फुटबल एकेडेमी सहिद स्मारक ‘बी’ डिभिजन लिगमा बढुवा भएको छ । ‘सी’ डिभिजनको शीर्ष दुईमा रहेर माथिल्लो लिगमा बढुवा हुन सफल भएको हो ।

आरसीले १२ खेलबाट २३ अंक जोडेको छ । उसले लिगमा अझै एक खेल खेल्न भने बाँकी नै छ । आरसीसँगै ११ खेलबाट २६ अंक जोडेको बागमति युवा क्लब पनि बी डिभिजनमा बढुवा भएको छ ।

मंगलवार भएको खेलमा आरसी–३२ ले रानीवन स्पोर्टस् क्लबलाई ५–० ले पराजित गरेको छ । उसका लागि कप्तान रोहन कार्कीले पहिलो हाफको ३४औँ मिनेटमा गोल गरेर टिमलाई अग्रता दिलाएका थिए । त्यसपछि सञ्जय लिम्बुले दुई तथा विवेक राई र सुजन मगरले एक÷एक गोल गर्दै ५–० को फराकिलो जित दिलाएका थिए ।

सी डिभिजनको अघिल्लो संस्करणमा पनि उत्कृष्ट प्रदर्शन गरेका आरसी केही थोरै अंकमा पछाडि परेर बी डिभिजनमा बढुवा हुनबाट रोकिएको थियो । यसपटक भने बढुवा हुन सफल भएको छ । कर्णाली प्रदेशबाटै पहिलो पटक बी डिभिजनमा क्लबको सहभागिता हुने भएको छ ।

 

प्रकाशित मितिः   २३ जेष्ठ २०८१, बुधबार ०९:२३