आज हम्र नाची ओ गाई
आऊ,
आज हम्र नाची ओ गाई
मृदङ ओ सखीए भाका सुनाई
जहाँ तुहार ओ म्वार रिस राग फे मेटी
जहाँ रमैटी रलह हमार चलेबेटी
ऊ नाच, ऊ गीतके खोजी करी
राज्य सरकार सत्तासे अधिकारके लाग लडी ।
काखर कि,
हमार बरघर हेराइटा
हमार भलमन्सा हेराइटा
हमार मटाँवा हेराइटा
हमार प्रथा परम्परा हेराइटा ।
आऊ,
आज हम्र नाची ओ गाई
मृदङ ओ सखीए भाका सुनाई
आऊ हम्र नाफुट्के जुटी,
पुरुब पश्चिउ, उत्तर दख्खिन मु नाकराऊ
हम्र फे यी देशके नागरिक हुइटी टु नाडराऊ
टु फे बाटो मे फे बटु
हमार बगराहान काकी फे बाटी
दहितान बुबा फे बाट
डाडुभैया, दिदीबाबु सबजे बाट
काखर कि
एक्क ठाउँ जुट्ना दिन हो, माघ
हमार पहिचान हो, माघ
हमार संस्कृति हो, माघ
हमार सुखानी दुखानी हो, माघ
लौव वरस हो, माघ
उन्मुक्ति दिवस हो, माघ
खुल्ला स्वतन्त्र हुइना दिन फे हो, माघ
आऊ,
आज हम्र नाची ओ गाई
मृदङ ओ सखीए भाका सुनाई
माघ थारुनके किल निहो
माघ पहाडी दादु भैयनके फे हो
मधेशी दादु भैयनके फे हो
तर म्वार ओ तुहार माघके सम्बन्ध
आकाशके चन्द्र ओ सुरजसे जोरगिल बा
जबतक यी धर्ती ओ आकाश रही
तबतक माघ ओ थारु एक रही ।
आऊ
आज हम्र नाची ओ गाई
मृदङ ओ सखीए भाका सुनाई
ठाउमुन्नाके तालम घुङ्ना बजाइ
गल्टक लेहेङ्गाम फिररा मराई
आफन भाषा आफन गीत जुग जुग बचाइ
डिजे डिस्को छोर्ख मन्द्रम नचाई
काखर कि
हमार संस्कृति हेराइटा
हमार भाषा हेराइटा
हमार धमार हेराइटा
हमार माँगर हेराइटा
हमार सजना हेराइटा
हमार मौलिकता हेराइटा
ओहमार,
हम्र सबजन जुटी
आफन आफन गाउँ गाउँसे उठी
आफन संस्कृतिके गारी बलगर खुटी
टु ओ मै लग्बी कलसे
हमार ओजरार संस्कृति कबु निबुटी ।
आऊ,
आज हम्र नाची ओ गाई
मृदङ ओ सखीए भाका सुनाइ
पुरुबसे पश्चिऊ सबजहन सुनाइ
आफन गीत बास मनके ओनाइ
हम्र हमार भाषाह मैया कर पर्ना बा
पुर्खन्हक सैदान बचाइ पर्ना बा
यी देश हमार फे हो बुझाइ पर्ना बा
टु कैह्यासम आनक गीतबास किल रमैबो ?
टु कैह्यासम आनक संस्कृतिम रमैबो ?
आब हम्र आफन गीतबास जोगाइ पर्ना बा
बर्का टिह्वारके ज्ञान गरिमा बताइ पर्ना बा ।
ओहमार आऊ गोची ओ गोचा हुक्र
आज हम्र नाची ओ गाई
मृदङ ओ सखीए भाका सुनाइ ।
मानबहादुर चौधरी ‘पन्ना’ ।