माघ सांस्कृतिक महोत्सव खुलामञ्चमा मनैल सुर्खेतके थारु

यह २०८० पौष २८ थारुनके महान चाड माघ पर्वके अवसरम सुर्खेतके थारु कर्णाली प्रदेशके राजधानी वीरेन्द्रनगरके घण्टाघरके खुला मञ्चम लखागिन थारु उत्थान मञ्च, सुर्खेत, थारु कल्याणकारिणी सभा सुर्खेत ओ राष्ट्रिय थारु कलाकार मञ्च, सुर्खेतके संयुक्त आयोजनाम २८ गते विविध सांस्कृतिक नाचगान झाँकीसहित बजार परिक्रमा कैख माघ सांस्कृतिक महोत्सव कार्यक्रम सम्पन्न कर्ल बाट । हरेक बरस थारु गाउँम किल मनैना थारु माघ महोत्सव कार्यक्रम असौक साल थारु कला, भेषभुषा, संस्कृति देखाक बजारम मनैलक बात कलाकार मञ्चके अध्यक्ष राजु चौधरी जनैल ।

कार्यक्रमम माघ पर्वके महत्व एवम् मौलिकताके बारेम लौव पुस्ताह जानकारी निहुइलक कारण संस्कृतिप्रति सद्भाव हेरैटी गैलक ओहर्से अखिस कार्यक्रमम माघक सामाजिक, सांस्कृतिक एवम् धार्मिक महत्वबारे प्यानलिष्ट छलफल छलफल फे कैगिल रह । छलफलम माघसम्बन्धी जानकार पुर्खा जागुराम थारु, थारु कल्याणकारिणी सभाके केन्द्रीय सदस्य कृष्णबहादुर थारु ओ समाजसेवी लालबहादुर चौधरी रलह कलसे प्यानलिष्ट छलफलके मोडरेटके भूमिकाम थारु अनुसन्धाता मान बहादुर चौधरी पन्ना रलह । छलफलम माघ पर्वह औपचारिक रूपम किल नमनाखन यी पर्वके मूलभूत मूल्य मान्यता, परम्परा, चालचलनह जोगैना आवश्यक रहल बात बटोइल । यकर लाग समयअनुसार रूपान्तरण हुइ पर्ना फे आवश्यक बा तर आफन मौलिकपन भुलक निहुइना तर्क कैगिल । लौव युवा पुस्ता ओ पुरानो पुस्ता दुनु जागरुक हुइ पर्ना जरुरी रलक निष्कर्ष निकारगिल रह ।

कार्यक्रमके बर्का पहुना वीरेन्द्रनगर नगरपालिकाके नगर उपप्रमुख निलकण्ठ खनाल– सदियौदेखि हेप्वा पाइल, चेप्वा पाइल थारु समुदाय देशम लोकतान्त्रिक गणतन्त्र स्थापनापाछ राज्यसत्ताम पहुँच पुग्लक तर्क कर्ल । स्थानीय तहम थारु समुदायक प्रतिनिधिके बल्गर उपस्थिति बा कल । नेपालम पञ्चायत कालके रज्वक समयम जमिनदार हुक्र स्वाझ थारु जातिन और (पल्लो) गाउँसे ऊ (वल्ला)े गाउँ नाजा, ऊ (वल्लो) गाउँसे और (पल्लो) गाउँ नाजा कलसे ब्वाल निसेक्ना थारु समुदाय आज ब्वाल सेक्ना हुइल बाट । आफन अधिकारक लाग लर सेक्ना, आफन माग मुद्दा स्थापित कर सेक्ना हुइल बाट । यी सब लोकतन्त्रले आनल उपलब्धि हो कल । थारु समुदाय कला संस्कृतिम बहुत धनी हुइलक ओहर्से सुर्खेतके थारु समुदायके लाग अप्न सदैव लाग्टि रहना ओ नगरपालिकामसे कर सेक्ना सब सहयोग हुइना प्रतिवद्धता फे जनैल ।

लखागिन थारु उत्थान मञ्च, सुर्खेतके अध्यक्ष मानबहादुर चौधरी पन्ना – लुम्बिनी ओ सुदूरपश्चिम प्रदेशक थारु समुदाय प्रदेश सरकार एवम् स्थानीय सरकारसे करिब ३ दिनसम थारु समुदायह विदा देना निर्णय कर्ल बा तर एक्क देशके नागरिक कर्णाली प्रदेशके थारु समुदाय माघके महान पर्वम फे कर्णाली प्रदेशके वीरेन्द्रनगर किल बैठल थारुन स्थानीय तहके सरकारसे थारु समुदायक कर्मचारी, शिक्षक, विद्यार्थी हुकहन दुई दिनसम्म फे बिदा निदेना दुखद बात हो कल । लुम्बिनी ओ सुदूरपश्चिम प्रदेशम हरेक वर्ष थारु समुदायह दुई दिनसम्म सार्वजनिक बिदा देति रहल अवस्थाम सुर्खेती थारु अन्यायम पर्लक गुनासो कर्टि आगामी दिनम यी बात स्थानीय सरकार गम्भीर रूपम लिह पर्ना ओ विदाके सुविधा दिह पर्ना माग कर्ल  ।

 

कार्यक्रमम वीरेन्द्रनगर नगरपालिकाका कार्यपालिका सदस्य सरिता चौधरीले – थारु समुदायके लाग सद्दभर लागि पर्ना ओ आफन समुदायले ढरल माग योजनाह अघारि बह्रनौ प्रतिवद्धता व्यक्त कर्टि माघक शुभकामना व्यक्त कर्ल रलही ।

कार्यक्रमम थारु कल्याण कारिणी सभाका जिल्ला सभापति बेचुलाल चौधरी स्वागत मन्तव्य देल रलह । कार्यक्रमम थारु समुदायके उत्थानक लाग निरन्तर थारु गीतवास, भाषा, कला, संस्कृतिम विशेष योगदान पुगाइल समाजसेवी ओ कलाकार हुकहन सम्मान कैगिल रह । सम्मानित हुइनाम वीरेन्द्रनगर–२, के समाजसेवी कलाकार लालबहादुर चौधरी, मन्द¥या कलाकार कालुराम थारु, कलाकार कृष्णा चौधरी, वीरेन्द्रनगर–९ के मन्द¥या कलाकार शेरबहादुर थारु ओ वीनपा–१० के समाजसेवी तथा वुद्धिजीवि शनिश्ररा महतम रलह ।

माघ सांस्कृतिक महोत्सवम विभिन्न गाउँमसे छोक्रा मघौटा नाचके प्रतिस्पर्धा कैगिल रह । करिब १० ठो गाउँसे आइल छोक्रा मघौटा नाच प्रतियोगिताम वीनपा ९, तिलपुर गाउँ अग्घ्वा (प्रथम), वीनपा–१० पदमपुरक दुग्घ्वा (द्धितीय), विनपा–२ कोलडाँडा नयावस्तीके टिग्घ्वा (तृतीय) स्थान हुइल रलह कलसे बाँकी ठौरी, कोलडाँडा, कोनैठी, नयाँगाउँ, पातलगंगा, नयाघुस्रा, टर्का पर्सेनी सब सहभागी नाचह प्रोत्साहन स्वरूप सान्त्वना पुरस्कार प्रदान कैगिल रह । प्रतियोगी हुकहन पुरस्कार तथा प्रमाण पत्र कार्यक्रमके सभाध्यक्ष मानबहादुर चौधरी पन्ना प्रदान कर्ल रलह ।

कार्यक्रमम सुर्खेतके करिब २० गाउँसे झाँकीसहित उपस्थिति हुइल रलह । विभिन्न थारु कलाकारनके थारु नृत्य ओ गीतसमेत प्रस्तुत कैगिल रह । कार्यक्रमके सञ्चालन लखागिन थारु उत्थान मञ्च सुर्खेतके सचिव जित बहादुर चौधरी ओ राष्ट्रिय थारु कलाकार मञ्च, सुर्खेतके अध्यक्ष राजु चौधरी कर्ल रलह ।

प्रकाशित मितिः   १० माघ २०८०, बुधबार ०५:०३