गजल

१
काबा खै टुहार रूपम हेर्ती रनास मन लागठ
काबा खै टुहार बोलीम सुन्ती रनास मन लागठ ।
टुहार यादम मोर आँखी रातभर जागठ
टुहार यादम सद्दभर भुल्टी रनास मन लागठ ।
आँखी टुम्ठु त फे टुहार रूप आँजर पाँजर देख्ठु
टुहार मयालु क्वारम झुल्टी रनास लागठ ।
कौनो दिन निदेख्ठु त अँध्यरा रात होकि कठु
हर रात टुहार सँग बैस्टी रनास मन लागठ ।

२
रहर नै रलसे फे गाउँ छोर्क विदेश जाइ पर्ना बा
न्वान मिर्चक चट्निकसँग भात खाइ पर्ना बा ।
रहर नै रह आनक देशम जाख पस्ना चुहैना
ज्यान गैलसे फे बाकस प्याक होक आइ पर्ना बा ।
क्याकर रहर रहट जे विदेशिनके अह्राइल काम कर्ना
जन्नी लर्कनके मया मार्ख विदेशम धाइ पर्ना बा ।
क्याकर रहर रहठुई आँखी भर आँस लेल घर छोर्ना
प्रदेशी भूमिम भुख, प्यास नाकैख दिन कटाइ पर्ना बा ।

प्रकाशित मितिः   २ कार्तिक २०७९, बुधबार ०५:०३