तस्बिरमा हेर्नुहोस हुम्लाका मनोरम दृश्य

अझै यातायात सेवा नपुगेको मध्यपश्चिमको कर्णाली अञ्चलमा पर्ने विकट हुम्ला जिल्लामा मनै लोभ्याउने दृश्यहरु देख्न पाइन्छन् ।

1
अझैसम्म पनि यो जिल्ला सडकको राष्ट्रिय सञ्जालमा जोडिन सकेको छैन । यहाँका मानिस आफैँ भारी बोकेर वा चौंरीलाई बोकाएर आफ्नो दैनिक उपभोग्य सामान सदरमुकामबाट गाउँसम्म पुर्याउने गर्छन् ।

2

कर्णाली अञ्चलका पाँच जिल्लामध्ये हुम्ला र डोल्पालाई मात्रै सडकले जोड्न सकेको छैन। मानसरोबर जाने यामबाहेक अरु बेला फाट्टफुट्ट मात्रै हुम्लामा उडान हुने गरेको छ ।

3

हुम्लाको उत्तरी भेगमा पर्ने लिमि उपत्यका तिब्बती संस्कृतिका हिसाबले निकै प्रख्यात छ। सदरमुकामबाट ६ दिनको हिँडाइमा पुगिने लिमि उपत्यकामा हल्जी, जाङ र लाप्चा गरि तीनवटा गाउँ छन्।

4

लिमि उपत्यकाको जाङबाट हल्जी गाउँ हुँदै लाप्चा पुग्न सकिन्छ। वर्षमा निकै थोरै पर्यटक पुग्ने यो गाउँले पर्यटकीय सम्भावना प्रचुर मात्रामा बोके पनि सरकारले त्यो अनुसार प्राथमिकतामा राखेको देखिँदैन।

5

जाङ हुँदै पुगिने हल्जी गाउँमा रहेको हल्जी गुम्बा एक हजार वर्ष पुरानो मानिन्छ । गत वर्ष गएको भूकम्पले यो गुम्बामा केही क्षति पुर्याएको छ ।

6

लिमि उपत्यकाको हल्जी गाउँबाट मानसरोबर जाँदा लाप्जा भन्ने ठाउँ पुग्नु अघि यस्ता सुख्खा घाँसे मैदान देखिन्छन्, जहाँ खासगरी भारी बोक्ने चौंरी चराइन्छन् ।

7

चीनसँगको सिमानामा जोडिएको लाप्चाबाट मानसरोबर देख्न सकिन्छ । लिमि उपत्कायकाका बासिन्दाका लागि यही ठाउँबाट खाद्यान्न तथा दैनिक उपभोग्य समान ल्याउने गरिन्छ ।

8

हुम्लाबाट तिब्बत जाने नाका मध्यको एक हो हिल्सा । हुम्लाको हिल्सालाई मध्य र सुदुरपश्चिमका बझाङ, बाजुरा लगायतका जिल्लासंग यो सडकले जोड्न लागेको छ ।

9

लिमी उपत्यकाबाट सदरमुकाम सीमिकोट फर्कँदै गर्दा तातोपानी क्षेत्रमा थुप्रै यस्ता साना मानेहरु देख्न पाइन्छन् ।

10

हुम्लाको सदरमुकामबाट एक घण्टाको पैदल यात्रामा पुग्न सकिने बुराउसे गाउँमा पर्यटकलाई सजिलो होस् भनेर ’होमस्टे’ सञ्चालन गरिएको छ । ९ वटा घरमा पाहुनालाई राख्ने गरिएको यो गाउँमा महिलाले यसैगरी स्थानीय नाच देखाएर पर्यटकको स्वागत गर्ने गर्छन् ।

तस्बिरहरु : भरतबन्धु थापा

(http://www.bbc.com/nepali) बाट साभार