तीन दिनदेखि कर्णालीमा हवाई सेवा अवरुद्ध

हुस्सुका कारण कर्णालीमा तीन दिनदेखि हवाई सेवा अवरुद्ध भएको छ । कर्णालीमा उडान भर्ने नेपालगन्ज र सुर्खेतमा हुस्सु लाग्दा तीन दिनदेखि कर्णालीको हवाई सेवा सञ्चालन हुन नसकेको हो । हुम्लाको सिमकोट, मुगुको ताल्चा र डोल्पाको जुफाल विमानस्थलमा तीन दिनदेखि हवाई सेवा अवरुद्ध भएको छ ।

बिहानको समयमा नेपालगन्ज र सुर्खेत विमानस्थलमा हुस्सु लाग्ने हिमाली जिल्लाका विमानस्थलमा दिउँसो हावा चल्ने भएकाले हवाई सेवा अवरुद्ध भएको नेपालगञ्ज विमानस्थलका कार्यालय प्रमुख प्रेमनाथ ठाकुरले बताए । ‘नेपालगन्जमा बिहानै बाक्लो हुस्सु लाग्ने र मध्याह्नपछि हिमाली जिल्लाका विमानस्थलमा हावा चल्ने समस्याले हवाई उडान हुन सकेका छैनन्,’ उनले भने, ‘हुस्सुको समस्याले नेपालगन्जमा उडान नभएको तीन दिन भयो ।’

प्रकाशित मितिः   १० माघ २०७७, शनिबार ११:४४