कोरोनाबाट बच्न प्रदेश संसद्मा सतर्कता

कर्णाली प्रदेश सरकारको आगामी वर्षको नीति तथा कार्यक्रममाथिको छलफल चलाउन जेठ ११ गते तोकिएको प्रदेश सभाको बजेट अधिवेशनको तयारी तीव्र पारिएको छ । कोरोना भाइरस संक्रमण रोक्न संसद् सचिवालयले प्रदेशसभा भवनमा सावधानी अपनाएको छ । कोरोना संक्रमणबाट बच्नका लागि स्वाब संकलन तथा सम्पूर्ण स्वास्थ्य सामग्रीसहित सरसफाइको तयारी गरिएको हो ।

अधिवेशनमा सहभागी हुने मन्त्री, सांसद र सचिवालयका कर्मचारीहरूको बिहीवार पीसीआर विधिबाट कोरोना परीक्षणको लागि स्वाब लिइएको संसद् सचिवालयका सचिव जीवराज बुढाथोकीले जानकारी दिए ।

उनका अनुसार एक सय ६४ जनाको ‘नोजल स्वाब’ संकलन गरिएको छ । जसमा मुख्यमन्त्रीसहित विभिन्न विभागीय मन्त्री, सांसद र उनीहरूका स्वकीय सचिव, सवारी चालक, मर्यादापालक र संसद् सचिवालयका कर्मचारीहरू रहेका छन् ।

प्रदेश सभाको बैठकमा कोरोना भाइरसको जोखिम हुन नदिन स्वाब संकलन गरी परीक्षण गर्न लागिएको हो । सचिव बुढाथोकीले सबैको कोरोना परीक्षणको रिपोर्ट प्राप्त भएपछि निर्धारित मितिमा बैठक सुरु हुने बताए ।

‘संसद् सचिवालय परिसरमा क्लोरिन छर्कने, साबुन, पानी, सेनिटाइजर लगायतका स्वास्थ्य सुरक्षा सामग्रीको व्यवस्थापन गरेका छौं,’ सचिव बुढाथोकीले भने, ‘सामाजिक दूरी कायम गरेर बस्ने प्रबन्ध मिलाइएको छ ।’ बैठक कक्षको दर्शक दीर्घामा ४८ सिट र तल ४२ सिट भएकोेले सबैको व्यवस्थापन गरी सांसदहरूलाई दूरी कायम गरी राख्ने तयारी भएको उनले बताए । दर्शक दीर्घामा रहने दर्शक र पत्रकारहरूलाई भने बैठकभित्र छिर्न नदिइने उनले बताए ।

जोखिमको मध्यनजर गर्दै पत्रकार र दर्शकहरूलाई प्रतिक्षालयको हलमा बस्ने व्यवस्थापन मिलाइएको उनले जनाए । वर्षे अधिवेशनभर नीति तथा कार्यक्रम प्रस्तुत गर्ने, बजेट प्रस्तुत र नीति कार्यक्रमसहित बजेटमाथिको छलफलको गर्नेलगायतका एजेण्डा रहेको उनले बताए । यसबाहेक केही विधेयकहरू ल्याउने र छलफल गर्ने तयारी पनि रहेको उनले जानकारी दिए ।

प्रकाशित मितिः   ९ जेष्ठ २०७७, शुक्रबार ०८:१४