हुम्लाका नागरिकलाई हवाई मार्गबाट उद्धार
सुर्खेतः लकडाउनका कारण सुर्खेत र नेपालगञ्जमा अलपत्र परेका हुम्लाका नागरिकलाई हवाई मार्गबाट उद्धार गर्न थालिएको छ । कर्णाली प्रदेश सरकारको पहलमा राष्ट्रिय सडक सञ्जालमा नजोडिएको हुम्लाका नागरिकलाई हवाई मार्गबाट उद्धार गरिएको हो । लकडाउनअघि कामको सिलसिलामा सुर्खेत र नेपालगञ्ज आएका व्यक्तिलाई आजदेखि प्रदेश सरकारको पहलमा जिल्ला पु¥याउन लागिएको छ ।
उद्योग, पर्यटन, वन तथा वातावरणमन्त्री नन्द सिंह बुढाले खान बस्न समस्या हुन थालेपछि उनीहरुलाई जिल्ला पठाउन पहल गरिएको बताए । हवाई भाडा भने यात्रुु आफैंले तिर्नुपर्ने छ । प्रदेश सरकारले एयरलाइन्ससँग समन्वय गरेर जेष्ठ नागरिक, पूर्ण अपाङ्गता भएका व्यक्ति र विद्यार्थीहरुलाई ५० प्रतिशत छुट दिने व्यवस्था मिलाएको छ ।
उद्धार गरेर पठाइएका व्यक्तिहरुलाई सम्बन्धित स्थानीय तहको क्वारेन्टाइनमा राख्नका लागि समन्वय भएको सामाजिक विकास मन्त्री दल रावलले बताए । उनका अनुसार सुर्खेत विमान स्थलबाट आज बिहान ५० जनालाई हुम्ला पु¥याइसकिएको छ । ‘यहाँबाट पठाइएका सबैलाई अनिवार्य रुपमा क्वारेन्टाइनमा राख्न सम्बन्धित स्थानीय तहलाई भनेका छौं,’ उनले भने, ‘१४ दिनसम्म क्वारेन्टाइन राखेर कोरोना परीक्षण पछि मात्र घर पठाउने व्यवस्था हुन्छ ।’