रारा नाटक महोत्सवको आय–व्यय सार्वजनिक

सुर्खेत, गत फागुन २३ गतेदेखि २९ सम्म वीरेन्द्रनगरमा सञ्चालन भएको रारा राष्ट्रिय नाटक महोत्सको आम्दानी तथा खर्चको विवरण सार्वजनिक गरिएको छ । आरङ्ग नेपाल सुर्खेतले शुक्रवार वीरेन्द्रनगरमा पत्रकार सम्मेलन गरेर आम्दानी तथा खर्च विवरण सार्वजनिक गरेको हो ।
महोसत्समा ३१ लाख ४१ हजार ६ सय ७४ रूपैयाँ बराबरको आम्दानी तथा खर्च विवरण सार्वजनिक गरिएको छ । त्यस मध्ये आरङ्ग नेपालले १५ लाख ९१ हजार पाँचसय २२ रूपैयाँ स्थानीयस्तरमै स्रोत जुटाएको थियो । त्यसबाट महोत्सवमा खानबस्न, नाट्य समाग्री, इन्धन लगायतमा १३ लाख २१ हजार पाँच सय २२ रूपैयाँ खर्च भएको छ भने दुई लाख ७० हजार रूपैयाँ बचत रहेको छ ।
सातै प्रदेशबाट आएका कलाकारहरूका लागि यातायात खर्च, प्रमाणपत्र लागयत अन्य खर्चका लागि सांस्कृतिक संस्थान काठमाडौंले व्यवस्थापन गर्ने भने अनुसार १५ लाख ५० हजार एक सय ५२ रुपैयाँ यातायतमा खर्च भएको छ । महोत्सव अवधिभर १० हजारले अवलोकन गरेको जनाइएको छ । स्थानीय व्यवस्थापन खर्चमा आफूहरूले व्यवस्थापन गरेको र त्यसबाट केही रकम बचत भएको आरङ्ग नेपालका अध्यक्ष गशेणभक्त गौतमले जानकारी दिए । महोत्सवका कारण मोफसलमा हुँदै आएको रंगकर्म गतिविधिलाई केन्द्रसम्म जोडी नेपाली रंगमञ्चको प्रवद्र्धनमा सहयोग पुगेको अध्यक्ष गौतमको भनाइ छ ।
महोत्सवबाट बचेको रकमले सुर्खेतमा नाटक घर निर्माणमा सघाउने उनले बताए । ‘नाटक महोत्सवले कर्णाली प्रदेशलाई नाटकका माध्यमबाट एक ठाउँको कला, संस्कृतिलाई अर्को ठाउँका मानिसले हेर्ने र बुझ्नुका साथै रंगमञ्चीय प्रवद्र्धनमा यस प्रदेशको योगदान स्थापित गराउन सफल भएको छ’ उनले भने, ‘यसमा सहयोग गर्ने सबै सरोकारवाला निकायप्रति हामी आभारी छौं ।’