लखागिन थारु साहित्यके छैठौँ श्रृंखला सम्पन्न

सुर्खेत: यह गैलक अगहनके २८ गते सनिबारक दिन सुर्खेतके वीरेन्द्रनगर नगरपालिकामा लखागिन थारु साहित्यके छैठौँ श्रृंखला सम्पन्न हुइल बा । लखागिन थारु उत्थान मञ्च, सुर्खेतके अध्यक्ष एवम् वरिष्ठ थारु साहित्यकार मान बहादुर चौधरी ‘पन्ना’ के सभाध्यक्षता तथा थारु युवा सभाके अध्यक्ष पवन कुमार थारुके बर्का पहुनाइम कार्यक्रम सम्पन्न कैगिल बा ।

कार्यक्रमम स्रष्टा आपन आपन कविता, गजल, ओ मुक्तक वाचन कर्ल रलह । कार्यक्रमम पुरान माँगर गीत, ओ ढुमरु गीतफे प्रस्तुत कैगिल । कार्यक्रमम कवि मान बहादुर चौधरी पन्ना, लक्ष्मण चौधरी, गिटु चौधरी, जेबि डेमनडौरा, सलिन चौधरी लगायतके स्रष्टाहुक्र कविता, गजल ओ मुक्तक वाचन कर्ल रलह । कार्यक्रमम माघम गाजिना ढुमरु गित क्रिमलाल चौधरी गैल रलह । माँगर गित मानबिर थारु गैल रलह ।

कार्यक्रमके सभाध्यक्ष मान बहादुर चौधरी‘पन्ना’ भाषा साहित्य जीवनके अभिन्न पाटो हो । यम रुचि जगाइक लाग श्रृङ्खलाके सुरुवात कैगिलक हो । आपन भाषा साहित्य, कला संस्कृतिके संरक्षण करक लाग एक्कले लाग्खन किल सम्भव नैहो । सबजन जुट पर्ना हुइलक ओहर्से लौव पिँढीक युवा युवतिन जोर्ना पुलके रुपम आघ बह्राइक लाग कार्यक्रमह निरनतरता डेना बात ढर्ल ।

कार्यक्रमम बर्का पहुना पवन कुमार थारु थारु भाषा साहित्य श्रृंखलाले लौव ओ पुरान पुस्ता जोरजिना हुइलक कारण आफन कला संस्कृति बुझना मजा प्लेटफर्म हो । असिन मेरके कार्यक्रम सुर्खेत जिल्लाके गाउँ गाउँम फे ढर पर्ना सुझाउ डेल । वास्तवम हमार कला संस्कृतिके बल्गर पाटो भाषा हो । सुर्खेतके स्रष्टा हुकनक गीत बास, बट्कुहि प्रकाशनके लाग फे सहयोग कर्ना बटोइल ।

कार्यक्रमम समाजसेवी पुर्खा मानबिर थारु असिन कार्यक्रमले लर्कने हौसला बहर्ना, गित बास लिख्ना अभ्यास फे हुइना हुइलक ओहर्से अहमिन ढेर युवा लर्कन जोर पर्ना सुझाव डेल । कार्यक्रमके सञ्चालन साहित्यकार जेबि डेमनडौरा कर्ल रलह । कार्यक्रमके आयोजक संस्था लखागिन थारु उत्थान मञ्च, सुर्खेत ओ राष्ट्रिय थारु कलाकार मञ्च, शाखा सुर्खेतके संयुक्त आयोजनाम हुइना यी कार्यक्रम हरेक महिनक अन्तिम सनिच्चरके दिन श्रृंखला नियमित चल्टि आइल बा ।

प्रकाशित मितिः   १० पुष २०८१, बुधबार ०६:०२