दसवाँ थारु साहित्य सम्मेलन सम्पन्न
यह गैलक माघ १५ गतेसे १७ गतेसम पटेर्वा सुगौली गाउँपलिका–२, बेलवा, पर्साम थारू लेखक संघ नेपाल तथा थारू अतिथि सेवा सदन समितिके आयोजनाम दसवाँ थारु साहित्य सम्मेलन सम्पन्न हुइल बा ।
कार्यक्रमके बर्का पहुना नेपाल प्रज्ञा प्रतिष्ठानके उपकुलपति विमल निभा कल– ‘सक्कु भाषा, साहित्यके संरक्षण, संवर्धन कर्ना राज्यके दायित्व रलक बटोइल । प्रज्ञा प्रतिष्ठान ढेर भाषाके पत्रिका प्रकाशन सुरु करल जनैल ।’
थारु लेखक संंघ नेपालके केन्द्रिय अध्यक्ष डा. कृष्णराज सर्वहारी– थरुहटके पालिकाम थारु जनप्रतिनिधि होक फेन थारु भाषाके पठनपाठन हुइ निसेक्लक जिकिर कर्ल । उहाँ थारु बालबालिकाके लाग पठनीय सामग्री उत्पादन कर्ना ओ लेखक हुक्र ढेरसे ढेर बालसाहित्य सिर्जना करपर्नाम जोड डेल ।
कार्यक्रमम थारु लेखक संघमसे स्थापित ६० हजार राशीके थारु साहित्य पुरस्कार बाराके महाकवि हृदयनारायण चौधरी तथा ३० हजार राशीके थारु महिला प्रतिभा पुरस्कार कैलालीके गायिका समीक्षा चौधरीह डेगिल रह ।
ओसहख दसवाँ थारु साहित्य राष्ट्रिय सम्मेलनके अवसरम कैगिल कविता प्रतियोगिताम पैल्हा हुउइया सत्यनारायण दहित (कैलाली), दुस्रा भिमेश चौधरी (दाङ देउखुरी ) ओ तेस्रा प्रकृति पूजा (कञ्चनपुर) हुकिहिन् उपकुलपति निभा पुरस्कार प्रदान कर्ल रलह ।
ओसहख कार्यक्रमम मधुसुदन चौधरीके तितुली (थारु नेपाली बालकविता संग्रह), चन्द्रमणि महतोके घुघें मामा घुघें (थारु बालगित संग्रह), हृदयनारायण चौधरीके इतिहासो मिथेयास भेइसई, मोहन प्रसाद थारु, सिक्छा सतक (कविता संग्रह) ओ लोर्हल सिरोहल खिस्सा परतोख (कथा संग्रह), रिता चौधरी थारुके मत बैठा चुप (कविता संग्रह) मनिस, रोहन, प्रितम चौधरी थारुके तराईम पाजिना १०१ जडिबुटि कृति बर्का पहुना लगायत अतिथि हुक्र संयुक्त रुपम विमोचन कैगिल रह ।
कार्यक्रमम विभिन्न विषयम ६ सिर्सकके प्यानलिष्ट छलफल कैगिल रह । थारु साहित्य ओ पुरस्कारके महत्व शिर्षकम रामसागर चौधरी, शेखर दहित, बुद्धसेन चौधरी, शत्रुघन चौधरी बक्ता रल कलसे सहजकर्ता भिमेस चौधरी रलह । ओसहख शिक्षण पेसा ओ सिर्जनात्मक लेखन, जिएनजि पुस्ता ओ थारु समाज मेरमेरके विषयम प्यानल छलफल कैगिल रह ।
आगामी २०८३ फागुनम ११ औँ थारु साहित्य राष्ट्रिय सम्मेलन चितवनम कैजिना संघके अध्यक्ष डा. सर्वहारी जानकारी डेल । सम्मेलनम थारु भााषा, साहित्य ओ संस्कृतिके संरक्षण तथा प्रवर्धनके लाग बजेट विनियोजन कराइक लाग स्थानीय पालिका, प्रदेश तथा संघीय सरकारह दबाब डेना लागयतके ७ बुँदे घोषणापत्र जारी कैगिल ।
साझा बिसौनी ।