म्वार सपना

लहलह झुल्ना धानके बाला खेटुवा सुहैना
एक्क नास गोन्या चोल्या बठिनेन् सुहैना
डस्या आइल टिह्वार आइल आइल माघक दिन
अक्कहले बिताऊ कसिक जिबन टुहार बिन

डिह्वाम लाहिक फुला लहलह झुल्ना
मैया लागठ केबल टुहार कसिक भुल्ना
मुटु भित्तर लिखल बा, केबल टुहार नाउ
ठुुुसुन ठुसुन रुइटि रठु समझके टुहार गाउँ

बर्खा लागल हिलाकिचा हिउँड् लागल जुरार
टुहार आगमनले मोर मन हुइठा अजरार
बाबा जाइट ग्वाला डाइ जाइट बनुवा
दिदीबाबु परघर लग्ल हुइनु एकल मनुवा

पहर्ना लिख्ना रहर म्वार केबल सपना हुइल
दुःखकष्ट भ्वाग पर्ना कहाँ सुख हुइल
दियक जसिन केर्नी बन्ना म्वार रहर सपना
सिसा जसिन टुक्रा टुक्रा हुइल म्वार विपना

– लक्ष्मण चौधरी

प्रकाशित मितिः   ११ असार २०८२, बुधबार ०६:०२