थारु साहित्यकार पन्ना प्रादेशिक प्रतिभा पुरस्कारसे सम्मानित

सुर्खेत: थारु भाषा साहित्यकार मानबहादुर चौधरी ‘पन्ना’ क्षेत्रीय प्रतिभा पुरस्कार २०८० से पुरस्कृत हुइल बाट । साझा बिसौनी दैनिकके थारु भाषा विशेष परिशिष्टाङ्क ‘फूलुवार’ के सम्पादक ओ थारु मानक भाषा मस्यौदा समितिके सदस्य एवम् लखागिन थारु उत्थान मञ्च, सुर्खेतके अध्यक्ष चौधरीह नेपाल सरकार संस्कृति, पर्यटन तथा नागरिक उड्डयन मन्त्रालयसे यी पुरस्तकार प्रदान कर्लक हो । पुरस्कारके राशी रू. ५०,००० ओ सम्मान पत्रसे पूर्व संस्कृति मन्त्री हितबहादुर तामाङसे पुरस्कार प्रदान कैगिल रलह ।

भाषा तथा साहित्य विधातर्फ कर्णाली प्रदेशमसे उहाँ पुरस्कारके लाग छनोट हुइल रलह । सुर्खेत निवासी पन्ना विगत दुई दशकठेसे थारु भाषा, साहित्य, कला, संस्कृतिसम्बन्धी खोज तथा अनुसन्धानम सक्रिय बाट । उहाँ कविता, कथा, निबन्ध, गीत आदि विभिन्न विधाम कलम चलाक थारु साहित्यम श्रीवृद्धि कर्ल बाट । पन्नाके ढुकढुकी (मुक्तक, कविता २०५७), किसानके जिन्दगी (खण्डकाव्य २०६१), सख्या नाच (गीत २०७०), ककनडरान छोट्की (कथा, बट्कुही २०७०), एक गोरुवक् बटकुही (हाँस्यव्यंग्य सहलेखन २०७५) थारु भाषाके पोस्टा ओ हाम्रो थारु समाज र संस्कृति (२०७९) अनुसन्धानमुलक पोस्टा ओ थारु सख्या नाच गीत डकुमेन्ट्री २०८० प्रकाशित बटिन् ।

साझा बिसौनी दैनिकम हरेक महिनाके दोसर बुधवार प्रकाशित हुइना थारु भाषाके ‘फूलुवार’ पृष्ठसमेत पन्ना संयोजन तथा सम्पादन कर्टि आइल बाट । लेखन तथा सम्पादनमार्फत् थारु भाषा ओ साहित्यके विकासम योगदान पुगैलक ओहर्से मन्त्रालयसे प्रादेशिक प्रतिभा पुरस्कार प्रदान कर्लक हो ।

 

थारु संघसंस्थासे बधाइ ज्ञापन

थारु समुदायसे कर्णाली प्रदेशह चिन्हैलक कारण पन्नाह डा. कृष्णराज सर्वहारीके घरगोस्याइम हुइलक कार्यक्रमम विभिन्न थारु संस्थासे हार्दिक बधाई ओ शुभकामना फे प्रदान कैगिल बा । गत असार २९ गते काठमाडौ कीर्तिपुर पाँगाम बर्दियाली थारु विकास मञ्च, निस्राउ थारु समूह, चम्पन सांस्कृतिक मञ्चके संयुक्त आयोजनामा हुइना ठुम्रार साहित्यिक बखेरीके ९९ भागके बर्का पहुना बनाके हार्दिक बधाई देह रलहिन् । कार्यक्रमम थारु भाषा साहित्यमार्फत राष्ट्रहे चिन्हैना कर्णाली प्रदेशके पन्ना थारुनके गौरब बह्रैलकम शुभकामनासमेत देल रलहिन् ।

ओसहख यह साउन ५ गते थारु भसा साहित्यि विकास केन्द्र, नेपाल काठमाडौँके आयोजनाम नवनियुक्त युवा तथा खेलकुद मन्त्री माननीय तेजुलाल चौधरी ओ संस्कृति मन्त्रालयसे क्षेत्रीय प्रतिभा पुरस्कारसे पुरस्कृत थारु साहित्यकार द्वय कर्णाली प्रदेशके मानबहादुर चौधरी पन्ना ओ मधेश प्रदेशके बुद्धसेन चौधरीह बधाई तथा शुभकामना प्रदान कैल रह ।

प्रकाशित मितिः   ९ श्रावण २०८१, बुधबार ०५:०३