थारु भाषाके पाठ्यक्रम प्रवोधिकरण तालिम सम्पन्न

 

सामुदायिक र निजी दुनु तहके विद्यालयम थारु भाषा अनिवार्य लागु कर्ना बर्दियाके बारबर्दिया नगरपालिकामसे पहिल तयार कैगिल लिरौसी थारु भाषक स्थानीय पाठ्यक्रम बारबर्दिया गौरब (कक्षा १–३) के ३ दिन्या प्रवोधीकरण तालिम सम्पन्न हुइल बा ।

यह गैलक जेठ ३२ देखि असार २ गतेसम अंशुवर्मा उच्च मावि जयनगरम हुइलक पाठ्यक्रम प्रवोधीकरण तालिमके समापनके अवसरम बारबर्दिया नगरपालिकाकाके नगर प्रमुख छविलाल थारु कल, ‘यी पालिकाम ७३ प्रतिशत थारुनके बसोबास हुइलक ओहर्से थारु भाषाके पह्राइ सामुदायिक ओ निजी दुनु तहके विद्यालयम अनिवार्य रूपम लागु कर्ना सुरुवात कर्लक हो ।’ थारु भाषाके पठनपाठनले विद्यार्थी वर्गह ज्ञान हासिल कर्ना अहमिन् सहज हुइना उहाँक कहाइ रलहिन् ।

स्मरण रहोस्, बारबर्दिया नगरपालिका स्थानीय पाठ्यक्रम बारबर्दिया गौरब नेपाली भाषाम हाल पठनपाठन कर्टि बा । अधिकांश विद्यार्थी स्थानीय पाठ्यक्रम फेन नेपालीमसे उल्था कैख थारु भाषामै पह्राइ पर्ना अवस्थाले थारु भाषाके पुस्तकम जोड डेगिलक बारबर्दिया नगरपालिकाके शिक्षा शाखा प्रमुख टीकानाथ गोसाईं बटोइल । सामुदायिक ओ निजी दुनु तहके विद्यालयम थारु भाषा अनिवार्य लागु कर्ना बारबर्दिया नगरपालिका पहिलो हुइलक उहाँ जानकारी देल ।

तालिमके समापनम प्रशिक्षार्थीहरु सुष्मासागर देवकोटा, जगतराम थारु, विष्णु चौधरी तालिम बहुट फलदायी रलक बटोइल रलह । तालिमम १९ महिला तथा २२ पुरुष कैख ४१ जहनके सहभागिता रह ।

तालिमम राधाकृष्ण थारु जनसेवा केन्द्र तथा प्लान नेपालके सहकार्य कैगिल रह । असहख, तालिमके प्रशिक्षकद्वय डा. कृष्णराज सर्वहारी ओ नरेशकुमार चौधरी रलह ।

लिरौसी थारु भाषक स्थानीय पाठ्यक्रम बारबर्दिया गौरब (कक्षा १–३) के सार्वजिनिकीकरण जेठ ३१ गते एक कार्यक्रमके बीच कैगिल रह । कार्यक्रमके प्रमुख अतिथि डा. गोपाल दहित, बारबर्दिया नगरपालिकाके नगर प्रमुख छविलाल थारु, उपप्रमुख रत्नकुमारी पाण्डे, प्रशासकीय अधिकृत धर्मराज न्यौपाने, लेखक डा. कृष्णराज सर्वहारी हुक्र पाठ्यक्रम सार्वजनिक कर्ल रलह ।

प्रकाशित मितिः   १३ असार २०८१, बुधबार ०५:०४