सुर्खेतम मन्द्रा बजैना तालिम सञ्चालन हुइटी

सुर्खेत: लखागिन थारु उत्थान मञ्च सुर्खेतके आयोजनाम मन्द्रा बजैना ओ थारु नाच सिखैना तालिम यह बैशाख १६ गतेसे सञ्चालन हुइटी बा । प्रदेश सरकारअन्तर्गत शिक्षा विकास तथा निर्देशनालय सुर्खेतके आर्थिक सहयोग राष्ट्रिय थारु कलाकार मञ्च सुर्खेतके सहकार्यम यी तालिम सञ्चालन कर्ना मञ्चके अध्यक्ष मानबहादुर चौधरी जनैल ।

थारुनके मौलिक ठेट मन्द्रा बजैना, नच्ना परम्परा हेरैटी गैलक ओहर्से लोक कला संस्कृतिके संरक्षण कर्ना उद्देश्यले मन्द्रा बजैना तालिम सञ्चालन कर पर्लक बात मञ्चके उपाध्यक्ष लोक बहादुर चौधरी व्यक्त कर्ल । वर्तमान विश्वव्यापीकरणके एवम् अन्य जातिनके कला संस्कृतिके प्रभावम थारु लोक बाजा बजैना, नच्ना कला हेरैटी गैलक कारण यकर संरक्षण संवद्र्धन आवश्यकता महशुस कैक तालिम देह लग्लक बटोइल ।

पुरान पुर्खनके मौलिक कला सिप लौव युवा पुस्ताम पुस्तान्तरण कर निसेक्लसे संस्कृति लोप हुइना निश्चित बा । ओहमारसे हम्र आफन संस्कृतिके लाग जागरण लान पर्ना बात जरुरी बा ओहामार यी तालिम आझुक आवश्यकता रलक बात समाजसेवी सनिसरा महतम व्यक्त कर्ल ।

प्रकाशित मितिः   १३ बैशाख २०८०, बुधबार ०७:२०