थारू पत्रकार संघके पाँचौ महाधिवेशन

थारु पत्रकार संघ, नेपालके केन्द्रीय अध्यक्षम प्रदिप लेखी सर्वसम्मत चयन हुइल बाट । नवलपुरके अमलटारीम २०७८चैत २६ गते शनिच्चरके दिन सम्पन्न संघ पाँचौ महाधिवेशनम वरिष्ठ उपाध्यक्षम सन्तकुमार चौधरी, वाग्मती प्रदेश उपाध्यक्षम किशोर चौधरी, उपत्यका उपाध्यक्ष सहदेव चौधरी, प्रदेश नं १ उपाध्यक्ष कुलदिप चौधरी, लुम्बिनी प्रदेश उपाध्यक्ष शम्भु चौधरी, मधेस प्रदेश उपाध्यक्ष प्रतिमा चौधरी चयन हुइल बाट । सुदूरपश्चिम, कर्णाली ओ गण्डकी प्रदेश उपाध्यक्ष पाछ मनोनित कर्ना बटोइल । ओस्टक महासचिवम लक्ष्मी चौधरी, उपमहासचिवम चितवनके विजय चौधरी, सचिवम दिप्तीशिखा चौधरी, लीलानाथ गच्छदार, कोषाध्यक्षम चितवनके कारी महतो चयन हुइल बाट । सदस्यम सवि चौधरी, धिरेन्द्र चौधरी, मनोज चौधरी, सुमित्रा चौधरी, दिनेश कुमार चौधरी, जनक चौधरी, नवीन चौधरी ओ राज चौधरीसहित २५ सदस्यीय लौव कार्य समिति सर्वसम्मत चयन हुइल बाट ।

यिहीसे आघ संघके कार्यकाल दुई वर्ष रहना व्यवस्था विधानम रह । महाधिवेशनके बन्दसत्रमसे तीन वर्ष कार्यकाल रहना निर्णय पारित कैगिल बा । कुल २५ सदस्यीय कार्य समिति रहना संघम पश्चिम कञ्चनपुरठेसे पुरुब मोरङसमके सहभागिता करैना प्रयास कैगिल बा । कुछ जिल्लासे उम्मेदवारी निपर्लक कारण बाँकी दुईठो सदस्य मनोनित कर्ना अध्यक्ष लेखी जानकारी देल बाट ।

सुकबार थारु आयोगके अध्यक्ष विष्णु चौधरी कार्यक्रमके उद्घाटनके क्रमम संघे मुखपत्र फूलरिया, प्रवासम थारु पुस्तक तथा चितवन शाखाबाट प्रकाशित थारु क्यालेन्डरके विमोचन कर्ल रलह । संघके निवर्तमान अध्यक्ष सन्तोष दहित लगायत नयाँ कार्यसमितिके सफलताके कामना कर्ल रलह ।

प्रकाशित मितिः   १४ बैशाख २०७९, बुधबार ०५:०२