‘एमाले पहिलो पार्टी’

सुर्खेत: नेकपा (एमाले) का केन्द्रिय प्रचार विभाग उपप्रमुख विष्णु रिजालले एमालेप्रति जनताको आकर्षण देखेर सत्तारुढ गठबन्धन अत्तालिएको बताए । एमाले सुर्खेतको प्रचार विभागद्वारा मंगलवार आयोजित प्रशिक्षणमूलक भेलालाई सम्बोधन गर्दै उनले स्थानीय तह निर्वाचनमा एमाले नै पहिलो पार्टी बन्ने दाबी गरे । ‘एमालेप्रति जनताको आकर्षण र विश्वास छ,’ उनले भने, ‘मुलुकको समृद्धिका लागि एमालेबाहेक अरु पार्टीले अगुवाइ गर्नै सक्दैनन् ।’ नेता रिजालले एमालेविरुद्ध गरिएको गठबन्धनले आफ्नो पार्टीलाई कुनै असर नपर्ने समेत जिकिर गरे ।

वैशाख ३० मा हुने स्थानीय तहको निर्वाचनमा एमालेले जित्ने थुप्रै बलिया आधारहरू रहेको उनको दाबी छ । एमाले केन्द्रीय सदस्य समेत रहेका रिजालले पार्टी फुटको घाटालाई माओवादी केन्द्रबाट एमालेमा आएका नेता कार्यकर्ताले पूर्ति गरिसकेको बताए । एमाले सुर्खेतका प्रचार विभाग प्रमुख गंगाराम तिमिल्सेनाको अध्यक्षतामा भएको भेलालाई जिल्ला अध्यक्ष अमृत विसीलगायतले सम्बोधन गरेका थिए । स्थानीय तह निर्वाचन केन्द्रित उक्त प्रशिक्षण भेलामा झन्डै एक सय जनाको सहभागिता रहेको थियो ।

प्रकाशित मितिः   ८ बैशाख २०७९, बिहीबार ०५:०२