मनोनयन दर्ता आज

सुर्खेत: राष्ट्रिय सभा सदस्यको निर्वाचनका लागि आज (मंगलवार) मनोनयन दर्ता गरिने भएको छ । राष्ट्रिय सभामा खाली हुने १९ सीटका लागि निर्वाचन हुँदैछ ।

आगामी माघ १२ गते हुने राष्ट्रिय सभा सदस्य निर्वाचनका लागि आज मनोनयनपत्र दर्ता हुने निर्वाचन आयोगले जनाएको छ । आयोगले यसअघि नै कार्यतालिका सार्वजनिक गरिसकेको थियो । कार्यतालिका अनुसार पुस २१ मा उम्मेदवारको सूची सार्वजनिक गरिनेछ ।

आयोगका सहसचिव शालिग्राम शर्मा पौडेलका अनुसार २२ र २३ पुसमा मनोनयनपत्र र उजुरी उपर जाँचबुझ गरी निर्णय गर्ने तथा उम्मेदवारको नामावली प्रकाशन गर्ने, २४ पुसमा उम्मेदवारले नाम फिर्ता लिने र २५ पुसमा उम्मेदवारको अन्तिम नामावली प्रकाशन गरिनेछ । साथै, सोही दिन उम्मेदवारलाई निर्वाचन चिन्ह प्रदान गर्ने र तोकिएका मतदान केन्द्रहरूमा १२ माघमा बिहान ९ बजेदेखि अपरान्ह ३ बजेसम्म मतदान हुने कार्यक्रम रहेको छ ।

प्रकाशित मितिः   २० पुष २०७८, मंगलवार ०५:०१