एमालेका चार सांसद पदमुक्त

प्रदेशसभामा एमाले थप कमजोर, माओवादी–कांग्रेस सत्ता समीकरण झनै बलियो

कर्णाली प्रदेशमा माओवादी केन्द्र नेतृत्वको सरकारलाई विश्वासको मत दिने नेकपा (एमाले)का चार सांसद पदमुक्त भएका छन् । ती सांसदहरूमाथि एमालेले गरेको कारबाही सर्वोच्च अदालतले सदर गरेको छ । एमालेको भ्याकेट सदर भएपछि कर्णाली प्रदेशसभाका सांसद प्रकाश ज्वाला, अम्मर थापा, कुर्मराज शाही र नन्दसिंह बुढाको पद गुमेको हो ।

दलको ह्वीप विपरीत एमालेमा चार सांसदले गएको वैशाख ३ गते मुख्यमन्त्री महेन्द्रबहादुर शाहीलाई विश्वासको मत दिएका थिए । त्यसलगत्तै उनीहरूलाई पार्टीले कारबाही गरी एमालेको साधारण सदस्यसमेत नरहने गरी सांसद पदबाट हटाउने निर्णय गरेको थियो । पार्टी निर्णयविरुद्ध ती सांसदहरू आफूहरूको पुनर्वहालीको माग गर्दै सर्वोच्च अदालत पुगेका थिए ।

सोमवार प्रधानन्यायाधीश चोलेन्द्र शमशेर जबरा र न्यायाधीश प्रकाश ढुंगानाको संयुक्त इजलासले संसदीय दलको निर्णय विपरीत फ्लोर क्रस गर्नु लोकतान्त्रिक पद्धति एवम् संस्कार र मान्यता अनुकूल नभएको ठहर गरेको छ । यसअघिको २७ जेठमा सर्वोच्च अदालतले एमालेको १०औं महाधिवेशन आयोजक कमिटीलाई वैधानिकता दिन अस्वीकार गरेपछि उनीहरूको पद केही समयका लागि जोगिएको थियो । एमालेले त्यसविरुद्ध भ्याकेटमा गएको थियो । एमालेबाट पदमुक्त भएका ज्वालाबाहेक अरू तीन जना मन्त्री छन् ।

सर्वोच्चको आदेशसँगै एमालेका चार सांसद घटेपछि कर्णालीमा माओवादी केन्द्र नेतृत्वको सरकार स्पष्ट बहुमतमा पुगेको छ । ४० सदस्यीय प्रदेशसभा अहिले ३५ मा झरेको हो । माओवादी केन्द्रले यसअघि नै आफ्ना एक जना सांसदलाई पदमुक्त गरिसकेको छ । अब कर्णाली प्रदेशसभामा एमालेका सभामुखसहित १६, माओवादी केन्द्रका १२, कांग्रेसका ६ र राप्रपाका एक सांसद छन् । चार सांसद पदमुक्त भएपछि संसद्मा एमाले थप कमजोर बनेको छ भने माओवादी र कांग्रेसबीचको अहिलेको सत्ता समीकरण झनै बलियो भएको छ ।