बढ्यो कोरोना जोखिम

दुई सातामा भारतबाट तीन हजार बढी फर्किए, सुर्खेतमा ४३ जना सक्रिय संक्रमित

पछिल्लो दिनमा कोरोना भाइरस (कोभिड–१९) संक्रमणको दर बढेको पाइएको छ । शनिवारसम्म कर्णाली प्रदेशमा ४३ जना कोरोनाका सक्रिय संक्रमित छन् । यी सबै संक्रमित सुर्खेतका हुन् । शनिवार मात्रै थप १२ जनामा कोरोना पुष्टि भएको हो । प्रदेश स्वास्थ्य सेवा महाशाखाकाअनुसार फागुनको अन्तिमसम्म प्रदेशभर सक्रिय संक्रमितको संख्या ६ जना मात्र थियो । चैत महिना लागेयता यो संख्या बढ्दो क्रममा छ ।

हाल तीन जना संक्रमितको प्रदेश अस्पतालमा उपचार भइरहेको छ । संक्रमितमध्ये ४० जना होम आइसोलेसनमा रहेको महाशाखाले जनाएको छ । अघिल्ला महिनाको तुलनामा कोरोना संक्रमणको दर बढेको हो । सुर्खेतबाहेकका अन्य जिल्लामा भने कोरोना संक्रमण देखिएको छैन । सुर्खेतमा पुष्टि भएका सबै संक्रमित स्थानीय हुन् । जनस्वास्थ्य सेवा कार्यालयका प्रमुख चेतननिधि वाग्लेले यी संक्रमितको ‘ट्राभल हिस्ट्री’ नभएको बताए । केही दिनयता कोरोना संक्रमणको दर र जोखिम बढेको उनी बताउँछन् । उनले संक्रमणबाट जोगिन जनस्वास्थ्यका मापदण्ड अपनाउनुपर्नेमा जोड दिए । ‘कोरोना संक्रमणको जोखिम बढ्दो छ । सतर्कता अपनाएको पाइँदैन । सचेत हुन जरुरी छ,’ उनले भने ।

फेरि कोरोनाको जोखिम बढेपछि सरकारी स्तरबाट नियन्त्रण र रोकथामका प्रयासहरू थालिएका छन् । तर परीक्षण भने बढाइएको छैन । अहिले लक्षण देखिएकाहरूको मात्रै कोरोना जाँच गर्ने गरिएको छ । भारतमा कोरोनाको दोस्रो लहर देखिएको छ । त्यहाँ दैनिक हजारौं नयाँ संक्रमित भेटिने गरेका छन् । जसका कारण रोजगारीका लागि भारत गएका कर्णालीबासी धमाधम फर्कन थालेका छन् । उनीहरू सिधै गाउँमा जाँदा संक्रमण फैलने जोखिम पनि उच्च छ । भारतबाट फर्किएकालाई सीमा नाकामा ज्वरो मात्र जाँच गरेर पठाउने गरिएको छ । परीक्षणविनै गाउँ भित्रिदा संक्रमणको खतरा बढेको हो ।

प्रदेश स्वास्थ्य सेवा निर्देशनालयका निर्देशक डा. रबिन खड्काले एक सातायता संक्रमणको दर बढेको बताए । भारतबाट आएकालाई घरमै क्वारेन्टाइनमा बस्न भनिएको र सबैलाई जनस्वास्थ्यका मापदण्ड पालना गर्न आग्रह गरिएको उनी बताउँछन् । उनकाअनुसार आवश्यक परेको खण्डमा प्रयोग गर्न सकिने गरी प्रदेशमा दुई हजार जनाको क्षमता भएका क्वारेन्टाइनहरू तयारी अवस्थामा राखिएको छ । प्रदेशभरका अस्पतालहरूमा ३४ वटा भेन्टीलेटर र ६२ वटा आइसीयू बेड रहेको निर्देशक खड्काले जनाए ।

कर्णालीमा हाल दुई वटा विधिबाट कोरोनाको परीक्षण हुँदै आएको छ । पीसीआर र एन्टिजेन विधिबाट कोरोना परीक्षण गर्ने गरिएको हो । निर्देशनालयका अनुसार अहिले सुर्खेत र जुम्लाबाट मात्रै पीसीआर परीक्षण गरिएको छ । दैलेख र रूकुम–पश्चिममा रहेका ल्याबमा परीक्षण रोकिएको छ । यसअघि प्रदेशका चार स्थानबाट परीक्षण गरिँदै आएको थियो ।

कोरोना संक्रमणको जोखिम बढेकोले जनस्वास्थ्यका मापदण्ड अपनाउन स्थानीय प्रशासनहरूले समेत आग्रह गरेका छन् । सुर्खेतका प्रमुुख जिल्ला अधिकारी छविलाल रिजालले जोखिमजन्य गतिविधि नगर्न अनुरोध गरिएको जनाए । अनिवार्य मास्क प्रयोग गर्न, भौतिक दूरी कायम गर्न र भिडभाड नगर्न आग्रह गरिएको उनको भनाइ छ । पछिल्लो समय भारतबाट आएकाहरूको सामान्य स्वास्थ्य परीक्षण, निगरानी तथा विवरण राख्ने काम भइरहेको जिल्ला प्रशासन कार्यालयले जनाएको छ ।

कर्णाली सरकारले प्रदेशका तीन वटा नाकामा ‘हेल्थ डेस्क’ राखेर भारतबाट आउनेहरूको विवरण संकलन गरिरहेको छ । भारतबाट आएकाहरूको ज्वरो नाप्ने र लक्षण देखिएको परीक्षण गर्ने व्यवस्था मिलाइएको निर्देशनालयका निर्देशक डा. खड्काले बताए । प्रहरीकाअनुसार पछिल्ला दुई सातामा कमाइका लागि भारतमा गएका तीन हजार ५० जना कर्णाली फर्किएका छन् । प्रदेश प्रहरी कार्यालयका एसपी माधव श्रेष्ठले यो अवधिमा तीन हजारभन्दा धेरै संख्या कर्णाली भित्रिएको जनाए । कर्णाली भित्रिने मुख्य नाका बबई, कुइने र सल्यानको कपुरकोटमा निगरानी बढाउन चैत ११ गतेदेखि ‘हेल्थ डेक्स’ राखिएको हो । खुला सीमा भएको छिमेकी मुलुक भारतमा कोरोना संक्रमण बढ्दै गएपछि कर्णाली प्रदेश पनि ठूलो जोखिममा परेको छ ।