लकडाउनमा कडाइ

जारी लकडाउन खुकुलो बनाएसँगै जोखिम बढेको भन्दै सुर्खेतमा लकडाउनमा केही कडाइ गरिने भएको छ । कोरोना भाइरस (कोभिड–१९) को संक्रमण दर बढ्दै गएकाले पुनः लकडाउनमा कडाइ गर्न लागिएको हो ।

लकडाउन खुकुलो भएयता बजारहरू सञ्चालनमा आएपछि सुर्खेतमा चहलपहल निकै बढेको छ । जसका कारण कोरोना संक्रमण फैलने जोखिम पनि उच्च देखिएको छ । बुधवार जिल्ला प्रशासन कार्यालयमा बसेको जिल्ला कोभिड–१९ संकट व्यवस्थापन केन्द्रको बैठकले भोलि (शुक्रवार)देखि पसलहरू खुला गर्ने समय तथा सवारीसाधन सञ्चालनमा कडाइ गर्ने निर्णय गरेको हो ।

बैठकले बिहान ७ बजेदेखि बेलुका ५ बजेसम्म मात्र पसल खोल्न पाइने, अटो रिक्सालगायतका तीन पाङ्गे्र सवारी साधनमा रोक, जोरविजोर प्रणाली अनुसार मात्रै सवारीसाधन सञ्चालन गर्न पाइने लगायतका निर्णय गरेको छ । पसलहरूमा भिडभाड बढी हुन थालेपछि प्रशासनले लकडाउनमा कडाइ गर्ने निर्णय गरेको हो ।
कोरोना भाइरस ‐कोभिड–१९) रोकथाम तथा नियन्त्रणका लागि गत चैत ११ गतेदेखि सरकारले देशव्यापी रूपमा बन्दाबन्दी गरेको थियो । लामो समय लकडाउन हुँदा जनजीवन प्रभावित भएको, सर्वसाधारणमा असन्तुष्टि बढेको र उल्लंघन हुनथालेको भन्दै सरकारले यही असार १ गतेबाट लकडाउनलाई खुकुलो बनाएको थियो । सरकारले विभिन्न चरणमा लकडाउन खुकुलो गर्ने मोडालिटी बनाएको छ । जोखिमको अवस्था आँकलन गरेर विस्तारै खुकुलो गर्दै लैजाने सरकारको तयारी छ । यद्यपि, असार १५ को मन्त्रिपरिषद् बैठकले हाल कायम रहेको लकडाउनको अवधि साउन ७ गतेसम्म थप गर्ने निर्णय गरिसकेको छ । जिल्लाको हकमा सम्बन्धित प्रमुख जिल्ला अधिकारीले अवस्था हेरी लकडाउनमा कडाइ वा खुकुलो गर्न सक्ने भनिएको थियो । सरकारको यो निर्णयसँगै सुर्खेतका बजारहरूमा चहलपहल ह्वातै बढेको थियो ।

सुर्खेतमा बुधवारसम्म कोरोना संक्रमितको संख्या तीन सय ५४ जना पुगेको छ । जिल्लामा कोरोना संक्रमण समुदायस्तरमा फैलिसकेको छ । समुदायस्तरका २४ जनामा संक्रमण पुष्टि भइसकेको जिल्ला जनस्वास्थ्य सेवा कार्यालय सुर्खेतका प्रमुख चेतननिधि वाग्लेले बताए । उनका अनुसार स्वास्थ्यकर्मी, सुरक्षाकर्मी, बैंकका कर्मचारी, क्वारेन्टाइनमा खटिएका व्यक्ति र समुदायका व्यक्तिहरूमा संक्रमण फैलिएको हो ।

प्रदेश स्वास्थ्य सेवा महाशाखाको पछिल्लो तथ्याङ्कअनुसार कर्णालीमा कोरोना संक्रमितको संख्या एक हजार चार सय ६८ पुगेको छ । प्रदेशमा सबैभन्दा बढी संक्रमित दैलेखमा भेटिएका छन् । दैलेखमा सात सय ६५ जनामा संक्रमण देखिएको छ । प्रदेशको संक्रमण धेरै हुने जिल्लामा सुर्खेत दोस्रो हो ।

भीडभाड बढेपछि संक्रमणको जोखिम देखिएकाले यथास्थितिको लकडाउनमा थप कडाइ गर्न लागिएको प्रमुख जिल्ला अधिकारी हिरालाल रेग्मीले बताए । ‘नास्ता पसल, होटल, रेष्टुरेण्ट खुलेको पाइयो । साँझमा अलि धेरै भिडभाड हुने र सावधानी अपनाएको पाइएन,’ प्रजिअ रेग्मीले भने, ‘सबैले स्वास्थ्य सतर्कता अपनाउन जरुरत देखियो ।’ उनले समुदायस्तरका व्यक्तिहरूमा पनि कोरोना संक्रमण देखिएकाले थप सतर्कता अपनाउन लागिएको औंल्याए । यो निर्णय कार्यान्वयन गरेपछि त्यसको रिजल्टको आधारमा आगामी दिनमा मोडालिटी परिवर्तन गर्न सकिने उनको भनाइ छ ।

सुर्खेतमा लकडाउनको बीचमा केही समय खाद्यान्न हप्तामा तीन र तरकारी, फलफूल र दुग्धजन्य पसलहरू बिहान–साँझ मात्रै खुल्ने गरेका थिए । हार्डवेयर तथा निर्माण सामग्रीका पसलहरू बिहान ११ बजेदेखि चार बजेसम्म खुल्दै आएका थिए । लकडाउन खुकुलो भएसँगै बजार तथा कार्यालयहरू लगभग पूर्णरूपमा नै खुलेका छन् । यी स्थानहरूमा स्वास्थ्य सावधानी कसैले पनि अपनाएको पाइँदैन ।

सुर्खेतमा भोलिदेखि लागू हुनेगरी बजार तथा सवारीसाधन सञ्चालनमा कडाइ गरेको छ । तरकारी, फलफूल, दुग्धजन्य, ग्यास, औषधिलगायका अत्यावश्यक सेवा बाहेकका पसलहरू बिहान ७ बजेदेखि साँझ ५ बजेसम्म मात्रै खुला गर्ने निर्णय भएको छ । अत्यावश्यक बाहेकका पसल कम्तीमा हप्तामा एक दिन बन्द गर्नुपर्ने भनिएको छ ।

होटल, रेष्टुरेण्टलगायतका खाजा–नास्ता पसल, सैलुन तथा ब्यूटीपार्लरलाई पूर्णरूपमा बन्द गर्नुपर्ने भनिएको छ भने प्याक गरेर डेलिभरी गर्ने होटल र रेष्टुरेण्टले भने आफ्ना उत्पादन बिक्री गर्न सक्नेछन् । खुला रहने पसलहरूमा अनिवार्य रूपमा मूल्यसूची राख्नुपर्ने र सुरक्षा मापदण्ड पूर्ण रूपमा पालना गर्नुपर्ने प्रशासन कार्यालयले जनाएको छ । तीनपाङ्ग्रे सवारीसाधन सञ्चालनमा रोक तथा अन्य सवारीसाधन जोरविजोर प्रणाली अनुसार मात्रै सञ्चालन गर्नुपर्ने भनिएको छ ।