दर्जन बढी पुल अलपत्र

दैलेख : कर्णाली राजमार्गमा पर्ने एक दर्जनभन्दा बढी पुल अलपत्र परेका छन् । निर्माणमा ढिलाई हुँदा पुल अलपत्र परेका हुन् । राजमार्गअन्तर्गत दैलेखदेखि जुम्लासम्मको विभिन्न नदी तथा खोलामा निर्माण गर्नुपर्ने १५ मध्ये १४ पुल अधुरै रहेका छन् । एउटा पनि बाढीले क्षति पु¥याउँदै समस्या भएको छ । एक दशकदेखि राजमार्गका पुल बन्न सकेका छैनन् । विश्व बैंकका सहयोगमा १४ पुल निर्माणको ठेक्का दिइएको थियो भने एउटा पुल सडक डिभिजन कार्यालयले लगानी गरेको थियो । सबै पुलको निर्माण अवधि सकिन लागेको छ । निर्माण सम्पन्न गर्नुपर्ने समय तीन महिना मात्रै बाँकी रहेको सडक डिभिजन कार्यालय, सुर्खेतले जनाएको छ ।

सडक डिभिजन कार्यालयले वास्ता नगर्दा निर्माण कम्पनीले समयमै काम पूरा नगरेको स्थानीय बासिन्दाको आरोप छ । जसले गर्दा वर्षातमा कयौँ दिन यातायात नै अवरूद्ध हुने गरेको छ । अहिले विश्व बैंकको टोलीले पुल निर्माण स्थलको अनुगमन गरेपछि सडक डिभिजन कार्यालय र निर्माण कम्पनी दबाबमा परेका छन् । निर्माणको कामलाई तीव्रता दिएको सडक डिभिजन कार्यालयले जनाएको छ । काम नगर्ने निर्माण कम्पनीलाई कारबाही प्रक्रिया अघि बढाइने सडक डिभिजन कार्यालय, सुर्खेतका प्रमुख गुरू अधिकारीले बताए ।

कर्णाली राजमार्गअन्तर्गत दैलेख खण्डको राकम कर्णाली नजिक पर्ने जाक्सीखोलाको पुल अलपत्र छ । सात वर्षदेखि सरिया मात्रै ठड्याइएका छन् । गत वर्ष ढलान गरिएको थियो । तर, पूरा हुन सकेको छैन । त्यस्तै, दैलेखको डुंगेश्वर गाउँपालिकामा पर्ने पक्की पुलको बीचको भाग ढलान भएको छ । तर, असारमा आएको बाढीले पुलको एउटा किनारमा क्षति पु¥याएको छ । पुल सडकभन्दा होचो बनेको छ । सडक डिभिजन कार्यालय र निर्माण कम्पनीको लापरबाहीले सडकभन्दा होचो भएको स्थानीय बासिन्दाको भनाइ छ ।

प्रकाशित मितिः   ३० आश्विन २०७६, बिहीबार १२:२८