ब्राउनसुगरसहित ६ जना पक्राउ

साझा बिसौनी संवाददाता
सुर्खेत, ८ फागुन ।
जिल्ला प्रहरी कार्यालय सुर्खेतले लागूऔषध ब्राउनसुगरसहित ६ जनालाई पक्राउ गरेको छ । बुधवार १० ग्राम ७० मिलीग्राम ब्राउन सुगरसहित ६ जनालाई पक्राउ गरेको छ ।
नेपालगन्जदेखि वीरेन्द्रनगर आउँदै गरेको गाडी जाँच गर्दा प्रहरीले ब्राउन सुगर भेटाएको हो । वीरेन्द्रनगर नगरपालिका–११ सुब्बाकुना नाकामा बा ४ ख ४२१९ नम्बरको फोर्स गाडीलाई प्रहरीले जाँच गर्दा वीरेन्द्रनगर नगरपालिका–९ सुर्खेतका २३ वर्षीय किरण घलेको साथबाट तीन ग्राम ४९० मिलीग्राम ब्राउनसुगर बरामद गरेको जिल्ला प्रहरीका कार्यालय सुर्खेतका प्रवक्ता प्रहरी नायव उपरीक्षक प्रदीपबहादुर क्षेत्रीले जानकारी दिए ।
त्यसैगरी, सोही नाकामा नेपालगन्जबाट आएको भे १ ज ७८९ नम्बरको जीप प्रहरीले जाँच गर्दा त्यसमा सवार वीरेन्द्रनगर–१ सुर्खेत निवासी १८ वर्षीया अमृता कार्कीको साथबाट ६ ग्राम ५८० मिलीग्राम ब्राउनसुगर बरामद गरिएको प्रवक्ता क्षेत्रीले बताए । उनका अनुसार कार्कीसहित त्यसमा संलग्न वीरेन्द्रनगर नगरपालिका–४ सुर्खेत निवासी २० वर्षीय सम्राट सापकोटा, वीनपा–९ लाटीकोइलीका २३ वर्षीय अर्जुन खत्री, सोही वडाका १९ वर्षीय कुमार महतारा, २० वर्षीय सागर सुनार र वडा नं. १ बस्ने १८ वर्षीय दीपा कँडेललाई पक्राउ गरिएको छ ।
प्रहरीले १० ग्राम ७० मिलीग्राम ब्राउनसुगर अहिलेसम्मकै सबैभन्दा ठूलो परिमाण भएको बताएको छ । एक साताअघि सात ग्राम २७० मिलीग्राम ब्राउनसुगर प्रहरीले बरामद गरेको थियो । पक्राउ परेका ६ जनामाथि अनुसन्धान थालिएको जिल्ला प्रहरी कार्यालय सुर्खेतले जनाएको छ ।