सुर्खेतम मनागिल ठाउँ ठाउँम माघ सांस्कृतिक महोत्सव

सुर्खेत: २०८२ सालम सुर्खेत जिल्लाम विभिन्न ठाउँम मेरमेरिक झाँखीसहित थारुनके महान चाड माघ पर्वके अवसरम माघ सांस्कृतिक महोत्सव कार्यक्रम सम्पन्न कर्ल बाट । हरेक बरस माघक अवसरम मनाजिना माघ महोत्सव कार्यक्रम वीरेन्द्रनगर ११ के ढोलढुंगाम पुस २९ गते, थारु कल्याण कारिणी सभाके आयोजनाम पुस ३० वीनपा २ कोलडाँडाम ओ माघ ३ गते वीनपा ९ के पर्सेनी गाउँम माघ महोत्सव कार्यक्रम विविध थारु कला, भेषभुषा, संस्कृति देखाक मनैल बाट ।

हरेक बरस एक्क ठाउँम मनैना माघ कार्यक्रम विभिन्न ठाउँम मनाइ ब्याल ढेर गाउँक माघक म्याला, महोत्सव बारे असन्तुष्ट व्यक्त कर्ल बाट । वडास्तरसे आर्थिक सहयोग कैगिल माघक कार्यक्रम सम्बन्धित वडाके मनै किल जानकारी पैलक कारण कार्यक्रमम सहभागी नैहुइलक गुनासो थारु अगुवा कालुराम दहित बटोइल ।

विभिन्न वडास्तरम हुइलक कार्यक्रमके क्रम माघक ३ गतेक कार्यक्रमम बर्का पहुना नगर प्रमुख मोहनमाया ढकाल हरेक जातजातिके कला संस्कृति कलक नेपालके सांस्कृतिक धरोहर हो । आपन भाषा कला संस्कृति परम्पराके मूल्य मान्यता लौव पुस्ताह हस्तान्तरण कलक नै संस्कृति हो । संस्कृति सबजहन एकताबद्ध करैना करठ । एकआपसम सद्भावम बाँच सिखाइट कना विचार ढर्लि ।

लखागिन थारु उत्थान मञ्च, सुर्खेतके अध्यक्ष मानबहादुर चौधरी पन्ना–सबसे लग्घक सरकार वडा सरकार ओ नगर सरकार हो । वीरेन्द्रनगर नगरपालिकाम बैसल थारुने भावना विपरीत वडास्तरम कार्यक्रमके बजेट विनियोजनभन्दा समग्रम जिल्लाबासी समेट्ख माघ पर्वके उत्सव मनाइपर्ना जरुरी बा । यकर लाग नगर ओ वडासे सहयोगके वातावरण बनाइ पर्ना काम जनप्रतिनिधि ओ थारु अगुवा लाग पर्ना सुझाव डेल । माघक मुल मर्म सबजहन एक्क ठाउँम सिम्वाट पर्नाम भिन्न भिन्न गाउँम भिन्न भिन्न तौरतरिकासे मनैना मैगर ओ सैगर बन निसेक्लक बाट ढर्ल ।

कार्यक्रमम थाकसके सभापति बेचुलाल चौधरी, केन्द्रिय सदस्य कृष्ण बहादुर थारु आफन आफन मन्तव्य ढर्ल रलह । कार्यक्रम थारु संस्कृति बचाउ समूह वीरेन्द्रनगर ९ पर्सेनीके अध्यक्ष अनिता थारुके सभाध्यक्षम सम्पन्न हुइल रह । वीरेन्द्रनगर ९ के तिलपुर, पातलगंगा, पर्सेनी, जब्दी गाउँसे मौलिक मघौटा नाच प्रस्तुत कैगिल रह ।

प्रकाशित मितिः   १४ माघ २०८२, बुधबार १४:१५