नवौ थारु साहित्य राष्ट्रिय सम्मेलन बर्दियाम हुइटि

थारु लेखक संघ नेपालके मूल आयोजनाम नवौँ थारु साहित्य राष्ट्रिय सम्मेलन यह फागुनके १५, १६ र १७ गते बर्दियाके राजापुर बालाबजारम हुइटि बा । सम्मेलनम जंग्रार साहित्यिक बखेरी बर्दिया, थारु कल्याण कारिणी सभा शाखा बर्दिया, बरघर मटाँवाके विभिन्न संघ संस्थाके सहकार्य रहलक बात कार्यक्रमके जिल्ला संयोजक एवम् जंग्रार बखेरी बर्दियाके अध्यक्ष सोम डेमनडौरा जानकारी करैल बाट ।

सम्मेलनके संयोजक सोम डेमनडौरा सम्मेलनम राजापुरम शिक्षाके अवस्था, साहित्यिक कार्यक्रमके लाग एक कप चिया बहस, कथा वाचन, साहित्य लेखन कार्यशाला आदि बहस कर्ना विषयगत छलफल हुइना बात जानकारी करैल बाट ।

सम्मेलनम थारु भाषा, साहित्यह कसिक आघ बहै्रना कना विषयम विविध प्यानलिष्ट छलफल हुइना बात थारु लेखक संघके केन्दीय अध्यक्ष एवम् वरिष्ठ साहित्यकार कृष्णराज सर्वहारी जनैल । कार्यक्रमम थारु समुदायके आख्यान, कथा उपन्यास, कविता, गजल लगायतके विधाके लेखन कार्यशाला, विभिन्न जिल्लासे प्रकाशित थारु पोष्टाके प्रर्दशनी, कविता प्रतियोगिता, थारु भाषाम काखर लिख्ना एवम् शिक्षा क्षेत्रम राजापुर सेसन आदि चलैना योजना रलक बात जनैल बाट ।

साहित्य सम्मेलनम थारु भाषा साहित्यम कलम चलैना विशिष्ट योगदान डिहल एक एक जन पुरुष ओ महिला स्रष्टाह थारु साहित्य पुरस्कार प्रदान कर्ना बात आयोजक जनैल बा । तीन दिनसम चल्ना सम्मेलनम देशभरिक थारु बस्ती रहल जिल्लासे थारु साहित्यकार, पाठक विद्वत वर्ग सहभागि हुइटि बाट । गत वर्ष थारु साहित्य राष्ट्रिय सम्मेलन मोरङ जिल्लाम सम्पन्न हुइल रह ।

 

प्रकाशित मितिः   १४ फाल्गुन २०८१, बुधबार १३:५०