थारु साहित्य श्रृंखलाके सटवाँ भाग निम्जल

वीरेन्द्रनगर नगरपालिका सुर्खेतम गैलक फागुन २४ गते अन्तर्राष्ट्रिय नारी दिवसके अवसरम लखागिन थारु उत्थान मञ्च, सुर्खेत ओ राष्ट्रिय थारु कलाकार मञ्च शाखा सुर्खेतके संयुक्त रूपम नियमित हुइना लखागिन थारु साहित्य श्रृङ्खलाके सटवाँ भाग कविता, गजल ओ मुक्तक वाचन कैख निम्जल बा ।

राष्ट्रिय थारु कलाकार मञ्च शाखा सुर्खेतके सल्लाहकार मान बहादुर चौधरीके बर्का पहुनाइ ओ श्रृङ्खलाके संयोजकके घरगोस्याइम कार्यक्रम कैगिल रह । बर्का पहुना मान बहादुर चौधरी आफन पुरान कला संस्कृतिह बचाइक लाग युवा ओ पुर्खा मिल्ख लाग पर्ना आवश्यकता रलक बटोइल । विशेष अतिथि लखागिनके सल्लाहकार कालुराम दहित पुरान सजना गिड गैटि हम्र हमार गिड बास डेना तयारी बाटि तर दस्तावेजिकरण कर्ना काम युवाहरू कर निस्याकठुइट । यि कामह आघ बह्राइ पर्ना बात ढर्ल ।

कार्यक्रमम कवि लक्ष्मण उल्टह्वा बखरिया २०६१ सालम लिखल कविता २०८१ सालम लखागिन थारु साहित्य श्रृङ्खलाम सुनाइ पैलकम बहुट खुशी व्यक्त कर्ल । असिख कविता लिख्खन सुनैना अवसर पैलसे लिख्ना जाँगर लग्ना बातसमेत बटोइल । आब नियमित कविता सुन्ना ओ सुनाए अइना बाचा फे कर्ल रलह । महिला कवियत्री कृष्णा चौधरी नारीहे कमजोर नासम्झहो कना कविता सुनैल रलही । सुर्खेतके सशक्त गजलकार जेबि डेमनडौरा गजल बाचन कर्ल रलह । कार्यक्रमम सुर्खेतके गायक लक्ष्मण चौधरी फे गिड गैल रलह । कार्यक्रमके सञ्चालन जेबि डेमनडौरा कर्ल रलह ।

प्रकाशित मितिः   १३ चैत्र २०८१, बुधबार ०६:०२