हौसलाके केन्द्रबिन्दु रलहो टु सनिसरा
ए मीना आयोगके परीक्षा देले,
कैह्या आयोग पास कर्बे ?
हरेक भेटम सबसे पैल्ह
पुछ्ना प्रश्न रह यी ?
हरेक मीना हुकन्हक प्रगति चहना
आपन सङ्घर्ष मिहिनेतके बात कहना
बाँचटसम समाजह बनैटी रलहो हराभरा
मोर हौसलाके केन्द्रबिन्दु रलहो टु सनिसरा ।
आपन प्रमाण पत्र देखैटी,
मैयालु दृष्टि वर्षैटी,
आफन संघर्षके कहानी सुनैना
सफल जीवनके लाग उत्प्रेरणा जगैना,
मनक पिरम मलम लगैना
बाँचटसम समाजह बनैटी रलहो हराभरा
मोर हौसलाके केन्द्रबिन्दु रलहो टु सनिसरा ।
पछ्गुरल हमार समाजके
सीता, गीता, मीना हुकन्हक
सफलताके कहानी बिना सुन्ल
यी दुनियाँसे अस्तागैलो टु
कला, संस्कृतिके संरक्षण कर्टि कर्टि
हमहन टुवर बनाख कहाँ गैलो टु
सङ्घर्ष ओ चुनौतीसे लर सिखैना मनै
कत्रा झट्ट जीवनसे हार मान्लेलो टु
बाँचटसम समाजह बनैटी रलहो हराभरा
मोर हौसलाके केन्द्रबिन्दु रलहो टु सनिसरा ।
ग्वारा कट्ना हमार समाजम
हाथ पकर्ख साथम चल सिखैना
आपन पहिचान ओ अस्तित्वके लाग लर सिखैना
भष्ट्रचार ओ अन्यायके विरुद्धम आवाज उठैना
उज्जरल गाउँ बिग्रल समाजह एकजुट बनैना
छिट्कल युवा हुकहन संगठित बनैना
बाँचटसम समाजह बनैटी रलहो हराभरा
मोर हौसलाके केन्द्रबिन्दु रलहो टु सनिसरा ।
निडर, निस्वार्थी, जझारु व्यक्तित्व हुइटो टु
आपन पहिचान, अस्तित्वके बलगर जोधा रलहो टु
थारु समाजक बेथितिह पर्दाफास कर्ना
थारु भााषा कला ओ संस्कृतिके जर्गेना कर्ना
मङ्ला, बुधना, सुन्द्रा हुकहनक असहमतिह दुर करैना
थारु युवा हुकहन हौस्यैटी महसुर बनैना
बाँचटसम समाजह बनैटी रलहो हराभरा
मोर हौसलाके केन्द्रबिन्दु रलहो टु सनिसरा ।
तन, मन ओ वचनले पूरा कर्ना
सुग्घर सुसंस्कृतिके कुरा कर्ना
सङ्घर्ष, चुनौती ओ समस्यासे लर सिखैना
शिक्षाम पाछ परल थारु समाजह पह्र सिखैना
कला संस्कृतिके सिर्जनशील काम कर सिखैना
थारु समाजक लाग देखैलो मार्गदर्शन
युवा, वृद्ध सबजन कर्बि अनुकरण
कर्लो समाजक लाग त्याग समर्पण
टुँहार कामक जुग जुग करी सदा स्मरण
बाँचटसम समाजह बनैटी रलहो हराभरा
मोर हौसलाके केन्द्रबिन्दु रलहो टु सनिसरा ।
साझा बिसौनी ।