समाजसेवी सनिसरा
रातदिन खट्खन दौडधुप कर्लो,
गीत बनैलो सखिया बनैलो
एकआपसम ग्वारा कट्ना समाजहन
एकजुट बनाइक लाग सन्देश देलो ।
सबजन टुहार ऊ कामह रख्लह मनपरा
थारु समाजह टुवर बनाख कहाँ गैलो समाजसेवी सनिसरा ।
अभियन्ता हुइटो हेरैटी गैलक गीतबासहन बचैना
आफन मनक पिर नुकाख फे सबजहन हसैना
हरेक गाउँबस्तीम संस्कृतिके सन्देश पुगैना
युवा, वृद्ध, बालक, बुढापाका सबजहन सिखैना
सबजन टुहार ऊ कामह रख्लह मनपरा
थारु समाजह टुवर बनाख कहाँ गैलो समाजसेवी सनिसरा ।
कभु थारुन्हक छोक्रा नचैलो
कभु सख्या नाच नचैलो
कभु मन्द्रा बजैना सिप सिखैना काम कर्लो
माघक एकताके सन्देश फे देलो
भाषा बचैलो लखागिन किताब छपैलो
सबजन टुहार ऊ कामह रख्लह मनपरा
थारु समाजह टुवर बनाख कहाँ गैलो समाजसेवी सनिसरा ।
बन घुस्रक डक्टर्वा कैख गाउँम टुहार बयान करठ
संस्कृति पहिचान बचैना बात सबजन मनम ढरट
निस्वार्थी, संस्कृति प्रेमी, त्यागी समाजसेवी कहट
आघ बह्रो आघ सरो सबजन साथ देवी कहट
सबजन टुहार ऊ कामह रख्लह मनपरा
थारु समाजह टुवर बनाख कहाँ गैलो समाजसेवी सनिसरा ।
साझा बिसौनी ।