७ औं राष्ट्रिय थारु साहित्य सम्मेलन बाँकेम

सुर्खेत: ७औँ राष्ट्रिय थारु साहित्य सम्मेलन बाँकेम हुइना हुइल बा । थारु लेखक संघ नेपाल, थारु गोचाली समाज फत्तेपुर, बाँकेके सहकार्यम बाँकेके राप्ती सोनारी गाउँपालिका–६ सिद्धन्वामम माघ २०, २१ व २२ गते ३ डिन्या राष्ट्रिय सम्मेलन आयोजना कैगिलक् हो ।

थारु गोचाली समाजके अध्यक्ष देखलाल थारुके अध्यक्षताम यिह अठ्वार शनिच्रक डिनवा बैस्लक बैठकमसे थारु राष्ट्रिय साहित्य सम्मेलन आयाजेनाके मिति तय कैगिलक हो । ओस्टक सम्मेलनह भब्य व सभ्य बनाइलाग मेरमेह्रिक समिति फेन बनागिल बा । थारु लेखक संघक सदस्य शेखर दहितके संयोजकत्वम प्रस्तावना तयारी समिति, गोविन्द दहित चौधरीके संयोजकत्वम ब्यवस्थापन समिति, सोमनाथ थारुके संयोजकत्वम स्वागत सत्कार समिति, कालुराम थारुके संयोजकत्वम समन्वय तथा सहकार्य समिति, सुन्दरलाल थारुके संयोजकत्वम आर्थिक संकलन समिति, सुनिता थारुके संयोजकत्वम साँस्कृतिक समिति गठन कैगिलक समाजके महासचिव कालुराम थारु लौव अग्रासनह जनैल ।

सम्मेलनम झापासे कञ्चनपुर समके थारु साहित्यकारहुकनके सहभागिता रना थारु लेखक संघ नेपालके केन्द्रीय सदस्य तथा जंग्रार साहित्यक बखेरीके केन्द्रीय अध्यक्ष सोम डेमनडौरा बटोइल । उहाँके अनुसार सम्मेलनम मेरमेह्रिक विधाम साहित्य वाचनसंग सम्मेलन आयोजना हुइना जिल्ला तथा स्थानीय स्तरके एजेण्डाह विशेष प्राथमिकता डेख ब्यापक बहस व प्यानल छलफल कर्ना कार्यक्रम रहल बा ।

७औँ राष्ट्रिय थारु साहित्य सम्मेलनम समग्र बाँके जिल्ला व राप्ती सोनारीके मुख्य समस्या तथा समाधानके उपाय, शिक्षाके अवस्था, मटावा, बरघरके एजेन्डा, लौव जनप्रतिनिधिहुकनके कामके प्राथमिकता लगायतक विषय उठान हुइना उहाँके कहाइ रलहिन । ओस्टक सम्मेलनम संयुक्त रूपम पुस्तक विमोचन, पुस्तक मेला, साहित्यकारहुकन पुरस्कार, सम्मान प्रदान कैजिना आयोजनक जनैल बा । बैठकम थारु लेखक संघ नेपालके केन्द्रीय सदस्यद्वय शेखर दहित, बालिका चौधरी, सम्मेलनके संयोजक लक्ष्मी चौधरी, सहसंयोजक श्रीदेवी थारुलगायत स्थानीय युवाहुकनके सहभागिता रह । थारु लेखक संघसे हरेक बर्ष फरक फरक जिल्लाम राष्ट्रिय सम्मेलन कर्टि आइल बा । दाङके घोराहीम २०७३ सालम पहिला राष्ट्रिय थारु साहित्य सम्मेलन कैख कृष्णराज सर्वहारीके अध्यक्षताम थारु लेखक संघ नेपाल गठन कैगिल रह ।

ड्वासर राष्ट्रिय थारु साहित्य सम्मेलन कैलालीके पटेला, त्यासर सम्मेलन बर्दियाके बाँसगढी, चौथो सम्मेलन रूपन्देहीके सैनामैना, पाँचौ सम्मेलन सुर्खेतके वीरेन्द्रनगरमा हुइल रह ।

ओस्टक गत वर्ष २०७८ म कञ्चनपुरके सिंहपुरम छैठौ सम्मेलन हुइल रह । छैठौ सम्मेलनके स्मारिका प्रकाशनके तयारी हुइटी रलक थारु कल्याणकारिणी सभा, कञ्चनपुरके जिल्ला अध्यक्ष सुनिता चौधरी सानु अग्रसानह जनैली । सम्मेलनम छलफल हुइलक विषय व साहित्यकि विशेष स्मारिका निकर्ना तयारी रलक उहाँ बटोइली ।

प्रकाशित मितिः   १३ पुष २०७९, बुधबार ०५:०२