छठ्वा राष्ट्रिय थारु सम्मेलन सम्पन्न

कञ्चनपुर जिल्लाके कृष्णपुर नगरपालिका वडान नं ६ सिंहपुरम छठ्वा राष्ट्रिय थारु सम्मेलन १० बुँदे घोषण पत्र जारी कर्टि फागुन १४ गते निम्जल रह ।

थारु लेखक संघ नेपाल ओ थारु कल्याण कारिणी सभा कञ्चनपुरके आयोजना, गोचाली परिवार कञ्चनपुर सिंहपुर युवा क्लबके सहआयोजना तथा कृष्णपुर नगरपालिका, सोही नगरपालिकाके वडा नं ५ ओ ६ कार्यालय ओ ए आइ पिपिके सहकार्यम फागुन १२ गतेसे सुरु हइलक छठ्वा राष्ट्रिय थारु सम्मेलन १४ गते ओरैलक हो ।

सम्मेलनम थारु भाषा, साहित्य, लोक कला संस्कृति तथा सौन्दर्यह कसिक संरक्षण, संवर्धन ओ प्रवर्धन कर सेक्जाइ कना विषयम विविध विषयम प्यानलिष्ट छलफल ओ बहस कैगिल रह । सम्मेलनके घोषणापत्र जारी कर्टि थारु भाषा, कला, साहित्य,संस्कृति, उनन्नयनके लाग थारु साहित्यिक संघसंस्था, भाषाप्रेमी, लेखक, प्रकाशक, सम्पादक, अनुसन्धाता हुक्र एकजुट होक सहकार्य करना, थारु मातृभाषाम पठनपाठन कार्यान्वयनके लाग थरुहट क्षेत्रके पालिका ओ विद्यालयम पहल कर्ना, थारु लोक साहित्य तथा संस्कृतिके संरक्षण ओे प्रवर्धन सँगसँगे दस्ताबेजीकरणके लाग र्का कर्ना, लोक साहित्यके जानकार पुर्खा हुकहनह सम्मान कर्टि जैना ओस्टक घोषणापत्रम थारु समुदायके विषयवस्तु उठैना, आख्यान विधाओहर स्रष्टा हुकहन आकर्षित कर्ना मेरिक कार्यक्रम कर्ना, थारु लेखक संघ नेपालसे स्थापित थारु भाषा ओ साहित्यके क्षेत्रम महत्वपूर्ण योगदान डेहल स्रष्ट्रा हुकहनसे सम्मान ओ पुरस्कारके लाग अक्षय कोष रकम बह्रैटि लैजिना, थारु भाषाके विकासके लाग आपन भाषा बोल्ना, लिख्ना, ओ छप्ना छपैना कामम आइल निरन्तरता डेना ओ सिर्जनशील लेखनह आघ बह्रैना रहल बा ।

घोषणा पत्रम थरुहट क्षेत्रके प्रत्येक पालिकाह थारु भाषा, साहित्य ओ संस्कृतिके संरक्षण, विकासके लाग रकम छुट्याइक लाग पहल कर्ना ओ दबाब देना, छठ्वा राष्ट्रिय थारु सम्मेलनके स्मारिका प्रकाशित कर्ना आगामी सातौ राष्ट्रिय थारु सम्मेलन बाँके जिल्लाम २०७९ फागुन महिनाम आयोजना करना रहल बा ।

कञ्चनपुरम निम्जल साहित्य सम्मेलन भव्य, सभ्य एवम् सफतलापूर्वक सम्पन्न कर्नाम सहयोग करल स्थानीय निकाय अन्तर्गतके नगरपालिका ओ वडा कार्यालय, सिंहपुर युवा क्लब, सिंहपुर सामुदायिक वन उपभोक्ता समूह, टमाम संघसंस्था, भलमन्सा, समाजसेवी, पेशाव्यावसायी, मिडिया तथा सञ्चारकर्मी , स्थानीयवासी ओ प्रत्यक्ष अप्रत्यक्ष रूपम सहयोग करुइया एवम् टमाम जिल्लासे आइल सहभागी सक्कुजहनहे आभार व्यक्त कैगिल रह ।

उ सम्मेलनम दाङ देउखरके थारु गायक दोषहरण चौधरीह नगद रु १५,५५५ पुरस्कारसहित सम्मान पत्र देगिल रह । यी सम्मेलनले थारु भाषा, साहित्य, कला, संस्कृति प्रवर्धनम सहयोग पुगैना उद्देश्य हुइल सम्मेलनके मूल आयोजक समितिके संयोजक एवम् थारु लेखक संघके केन्द्रीय संयोजक डा.कृष्णराज सर्वहारी बटोइल ।

सम्मेलनम समकालीन साहित्य, कला तथा संस्कृतिबारे बहस, लेखक तथा स्रस्टाहुकहन ओ सरोकारवालाबिच बृहत अन्तरक्रिया तथा छलफल हुइल रह । प्यानलिष्टम थारु सौन्दर्यशास्त्रके खोजी, सुदुरपश्चिममे थारु राजनीतिक अवस्था, थारु साहित्यिक गतिविधि, थारु साहित्यम लेखनके डगर, साहित्यम महिला आवाज, खै थारु जोधा ओइनके खोजी, सामाजिक सञ्जालम थारु साहित्य लगायतके विषयम सम्मेलनम छलफल हुइल रह । सम्मेलनम थारु पहिचानके सवाल, थारु भाषाके कविता, मुक्तक वाचन समेत कैगिल रह ।

साहित्यिक सम्मेलनम यी बरसम प्रकाशन हुइल पुस्तकके विमोजन तथा विभिन्न समयम प्रकाशित टमाम पुस्तक प्रदर्शनी हुइल कलसे सम्मेलनम देश भरके करिब दुई सयसे ध्यार स्रस्टनके सहभागिता हुइल रह ।

हरेक साल हुइना साहित्य सम्मेलन इहिसे पहिल दाङके घोराहीम २०७३ बैशाख ३, ४ गते, कैलालीके पटेलामे २०७३ चैत १९,२० बर्दियाके बर्हैया तालम २०७४ माघ ४, ६ गते, रूपन्देहीके उचदिहुवाम २०७५ चैत २२ २३ गते, सुर्खेतके वीरेन्द्रनगरम २०७७ चैत २१,२२ गते सम्पन्न होसेक्ल बा ।

प्रकाशित मितिः   ९ चैत्र २०७८, बुधबार ०५:०६